今个礼拜五将会有一幅离岛长洲花屏路住宅地截标，系政府超过八年以嚟首幅同区供应，加上长洲嘅住宅买卖一向稀疏，喺缺乏参考下令市场嘅估值都出现颇大分歧，估值由介乎5,873万元到1.8亿元不等，每方尺楼面地价约莫2,000至6,130元，差幅足足超过两倍咁多。
刘Sir知道，呢幅长洲花屏路住宅地，占地约莫3.67万方尺，地积比率0.8倍，总楼面大约2.94万方尺，而建筑物嘅层数唔可以高过3层，而中标财团须於二○二○年三月底前完成项目。
其实政府近年推咗唔少离岛地皮，之不过单计长洲，就已经有足足超过八年无同区供应，数到对上一幅批出嘅长洲住宅地，系长洲水坑地皮，喺○七年三月由卓能集团（00131）以9,650万元投得，计番每方尺楼面地价约莫2,159元。
而再对上一幅批出嘅长洲住宅地，就更加要追溯到上一个世纪，长洲西湾地皮喺一九九九年以450万元成交。
地皮料最多值亿八
由於长洲地价都无乜数据可以参考，所以市场对呢幅花屏路地皮嘅估值都有几大分歧，其中估价比较进取嘅理想城市张圣典就同刘Sir讲，呢幅地皮位於长洲南部，大部分单位前临海景，预计可以作别墅式嘅豪宅发展，相信可以吸引唔少发展商参与竞投。张圣典最进取，估计地皮值约1.8亿元。刘Sir计番每方尺楼面地价大约6,130元，系目前市场嘅上限价。
享海景 无车路直达
不过，亦有测量师老友唔睇好呢幅离岛地嘅地价，中原测量师行张竞达就话，呢幅花屏路地皮嘅地势较高，料可享有海景，而附近亦有少量低密度式屋苑，好似花屏山庄同埋海景花园等，但系地皮嘅位置始终比较偏僻，无车路直达，距离长洲码头亦有约莫二十分钟步程。
张竞达估计地皮每方尺楼面地价大约2,000元。计番估值约5,873万元，系市场下限估值，相比地皮嘅上限估值大约1.8亿元，差幅足足超过两倍。
即将截标住宅地基本资料
地皮：长洲花屏路住宅地
占地：约36,706方尺
总楼面：约29,365方尺
市场估值：约5,873万至1.8亿元
每方尺楼面地价：约2,000至6,130元
截标日期：本周五
刘Sir
App下载
