政府近年都维持住稳定嘅土地供应步伐，唔少系来自屯门区，嚟紧今个礼拜五截标嘅屯门第16区海荣路与恒富街交界住宅地，系今个财政年度卖地计划嘅首幅截标地皮。由於呢幅地皮可作住宅同埋商业混合发展，测量师老友都觉得会有唔错嘅竞投反应，预计可以收到逾10份标书，地皮市场估值最高约莫14.18亿元。
刘Sir知道，今季卖地计划推出嘅5幅住宅地，其中屯门地皮就占咗3幅，先由上述屯门海荣路地皮打头阵，嚟紧周五截标，呢幅地面积大约5.2万方尺，可建楼面最多约35.46万方尺，包括约20.49万方尺嘅住宅楼面，同埋最多约14.97万方尺嘅商业楼面，而地皮无加设单位数目限制。
其实具备商业元素嘅住宅地不嬲都好受追捧，刘Sir老友理想城市张圣典就话，屯门海荣路地皮享有海景，而项目最低嘅三层可以用作商业发展，相信地价会反映佢嘅合理商业价值。
周五截标 尺价料四千
佢预计项目可以吸引超过10家财团入标竞投，至於每方尺楼面地价就估约4,000元。计番估值大约14.18亿元，系依家市场嘅上限价。
刘Sir另一个老友天俊测量师行张楚然都觉得，呢幅本周五截标嘅地皮，日后部分单位有享海景，而且区内环境清静，有一定吸引力，美中不足系地形唔够方正，剪裁上有难度，佢预计每方尺楼面地价约莫3,449元。用最大楼面计估值就大约12.23亿元，系市场预期嘅下限价。
商住成新宠 财团争爆
无可否认，商住项目近期都慢慢变成发展商嘅新宠，每逢推出都定必有理想反应，好似市区重建局土瓜湾北帝街商住项目，喺上个礼拜就吸引32家财团递交意向书，仲平埋市建局项目嘅新高。
又好似今年初批出的葵涌兴芳路商住项目，当时都收到19份标书，最后由不知名财团以每方尺楼面地价6,701元投到。
本周截标屯门地皮基本资料
地皮：屯门第16区海荣路与恒富街交界
占地：约52,002方尺
总楼面：约354,572方尺
市场估值：约12.41亿至14.18亿元
每方尺楼面地价：约3,500至4,000元
App下载
