劏房乱象禁不绝 无壳蜗牛有谁怜

新闻资讯 > 地产新闻 返回
浏览人次 : 6954
地产新闻
劏房乱象禁不绝 无壳蜗牛有谁怜
(东方) 2015年5月2日
港府查封违规工厦劏房出师不利,一批受影响住户连日来示威抗议,甚至通宵留守屋宇署办事处,仲扬言要坚持到下周一,令本来已经浮躁不安嘅社会增添几分戾气。房屋问题持续恶化,民怨不断升温,当局再唔谂办法拆除呢个计时炸弹,迟早爆大镬咋。

件事系咁嘅,荃湾荣丰工业大厦涉嫌违规改建成劏房而被屋宇署查封,居民指摘当局事前冇知会,令佢哋顿失居所,加上不满被安排入住距离遥远嘅屯门临时收容中心,难以负担昂贵嘅交通费,要求当面向屋宇署署长陈情,如果署方唔回应,唔排除将行动升级咁话。

即系咁,违规劏房乱象丛生,唔单止环境挤迫,衞生欠佳,而且存在安全隐患,仲惨过第三世界国家,的确需要整顿。好似荣丰工厦劏房咁吖,隔篱就系化学品仓库,万一发生意外,后果不堪设想o架。所以话,当局查封违规劏房系无可厚非嘅,问题系,如果沟通不足,安排失当,引发官民冲突,咁就随时弄巧反成拙喇。正所谓,有头发冇人想做瘌痢,居民被迫住喺违规劏房,系无可奈何嘅选择,当局一声查封就搞到佢哋无家可归,都咪话唔旁徨。

系人都知,今时今日房屋供应短缺,导致劏房遍地开花,荣丰工厦劏房不过系冰山一角咋。嗱,货柜劏房、鸡栏劏房、猪栏劏房、教堂劏房、厕所劏房,连天桥底都唔放过,简直系五花八门,千奇百怪,证明房屋问题有几咁严重。咪以为劏房租金平吖,如果按尺计,分分钟高过半山豪宅,而且仲要争崩头添,你话系咪夸张吖!

俗语话,有需求就有市场,违规劏房禁之不绝,皆因房屋供应长期不足,好多无壳蜗牛唔住劏房,就只能瞓街,根本冇得选择。其实,港府正正系工厦劏房嘅始作俑者,早几年港产官僚曾主动提出「容许工厦改建为过渡性小型住宅」,希望纾缓房屋供应压力喎。点知噏完就算,拖拖吓冇咗件事,业主固然无所适从,劏房居民更只能望天打卦。事实证明,信佢一成,双目失明,港产官僚真系靠唔住o架。

讲嚟讲去,房屋问题搞成咁,都系前朝贪曾政府无所作为种下嘅祸根,现届政府话就话要拨乱反正,将房屋问题作为施政重中之重,可惜巧妇难为无米之炊,喺重重阻力之下,觅地起楼寸步难行,重中之重变成痛中之痛。正如杜甫话斋,「安得广厦千万间,大庇天下寒士俱欢颜。」古人为居住问题伤脑筋,今日港人一样咁烦,简直可悲!