政府维持稳定嘅推地步伐，嚟紧今个礼拜五就轮到西贡对面海康健路住宅地截标，呢幅地皮可作低密度住宅发展，而且所牵涉嘅投资额唔大。刘Sir觉得喺西贡有发展项目嘅信置（00083）同新世界（00017）都有机会入标，亦会吸引部分中小型财团出手，地皮市场最高估值约莫4.13亿元，计番每方尺楼面地价大约8,000元。
刘Sir知道，今次截标嘅西贡对面海康健路住宅地，占地大约36,857方尺，可建楼面约莫51,593方尺，而据地契嘅规定，建筑物嘅高限为5层，亦没有限量条款规限发展。
楼面尺价料达八千
近排唔少规模比较细嘅地皮都有唔错竞投反应，相信呢幅西贡住宅地亦会有返咁上下参与度。
刘Sir老友理想城市张圣典就觉得，今次嘅入场门槛唔高，地皮位置唔错仲有海景，具有潜力打造豪宅，对将来嘅价格有一定保证，预计每方尺楼面地价约莫8,000元左右。计番估值即系大约4.13亿元，系市场估值嘅上限价。
老友高纬环球张翘楚都觉得，项目始终系细价地皮，相信竞投反应唔差得去边，估计每方尺楼面地价约7,800元，折合估值约4.02亿元。
刘Sir都知，政府近年都批咗唔少西贡地皮。最近一幅就系旧年三月批出嘅碧沙路与清水湾道交界洋房地，成交价1.6亿元，每方尺楼面地价大约19,935元，系新界区政府卖地尺价历来次高。
其实全个新界区最高尺价嘅土地都系由西贡地保持，西贡银线湾碧沙路洋房地皮一一年以7亿元批出，每方尺楼面地价约21,349元。
信置密扫同区地皮
西贡除咗洋房低密度发展地皮之外，喺前年，区内都有两幅限量住宅地批出，包括当年十一月期间，以8.5亿元批出嘅西贡笃康村路限量地，同埋一月份售出嘅西贡沙角尾限量地，成交价14.55亿元，呢两幅地皮都系由信置投得。
刘Sir
App下载
