依家楼价高企，唔少拥有自住物业嘅业主只能享受纸上富贵，但政务司前司长林瑞麟近日就出售手上物业。市场消息指出，林瑞麟同家人名下嘅赤柱柏涛小筑复式户，啱啱连同两个车位出售，售价高达五千万元，实用尺价约二万六千元，较十年前买入时作价一千八百万元升值约一点八倍，即狂赚三千二百万元。今次佢高价卖楼赚钱「袋住先」，莫非认为楼市已经见顶？
林瑞麟曾经系官场出名嘅楼王，该单位喺○四年四月、即沙士后嘅低位买入，实用面积约一千九百一十五方尺，属自用物业，出售时连有租约，月租约八万元。讲起呢个单位都曾经成为外界焦点，事关四年前林瑞麟出任政制及内地事务局局长时，被踢爆住所天台有僭建帐篷同围栏，当时林瑞麟矢口否认，惟其后自爆已将上述僭建拆除。
一二年六月底林瑞麟退任后，即到牛津大学修读神学，自此鲜有出席公开活动。旧年底本报发现林瑞麟在港行踪时，佢嘅身形明显消瘦，精神唔错。今次佢卖咗层楼，唔知系换楼定系睇淡后市呢？不过，袋住半亿元咁爽，日后想点都得喇！
App下载
