楼市出更:官舍大卖 收益多两倍

新闻资讯 > 地产新闻 返回
浏览人次 : 7810
地产新闻
楼市出更:官舍大卖 收益多两倍
(太阳) 2015年4月14日
近排豪宅交投畅旺,刘Sir睇番咁多年,政府产业署一向因应市况出售过剩嘅政府宿舍物业,署方一三年就停止出售宿舍,到旧年恢复番,卖咗23个物业,套现4亿。今年产业署就明显加快步伐,年初至今暂已售出共56个物业,收益超过12亿元,比一四年全年收益,还高出两倍,已为○九年后新高。去年该署出租宿舍收入1.599亿元,按年少约3%,为一一年后最少。

产业署趁市旺出售过剩政府宿舍,刘Sir知道,佢哋喺今年二月初就推出咗10个港岛区豪宅单位拍卖,其中港岛薄扶林碧瑶湾占咗5伙单位,大坑愉富大厦亦占咗3伙,套现约3.2亿元,同月该署又攞咗九龙郝德杰道8至10号出嚟招标,涉共46个单位,最终由香港大学以9.01亿元购入。

署方年初至今做咗两次招标同拍卖,已经售出56个宿舍单位,收益12.21亿元,较旧年全年收益4亿元,还大幅多出两倍。

去年租金收入微跌3%

值得一提嘅,署方喺一三年曾经因市场情况暂停出售有关过剩宿舍单位,到一四年下半年才重新出售有关物业单位,旧年共售出23个宿舍单位,其中碧瑶湾占7伙最多,涉及金额约2.2亿元,占全年嘅收益一半以上。刘Sir计一计数,该署喺一四年至今,售出唔少豪宅单位,热门屋苑包括碧瑶湾占12伙单位,愉富大厦有5伙。

据该署最新资料,去年该署共租出298伙宿舍单位,比一三年增加咗3伙,租赁务表现都算平稳。不过,刘Sir发现,虽然旧年出租单位数目按年略为增加,但涉及嘅租金收入就轻微下跌,录得1.599亿元,较一三年1.647亿元,按年减少咗480万元或约3%。

腾出四地年内转用途

此外,政府近年积极抢地建楼,但喺现成可供发展嘅住宅地皮唔系好多,今年产业署计划腾出另作处置、重新发展或作其他用途嘅土地数目共有4幅,土地面积合共约22.1万方尺,较旧年约11.1万方尺,多出近一倍,当中只有2幅作私人住宅发展,包括地盘面积最大、近13万方尺嘅屯门前哥顿军营。

刘Sir