安置屋十室九空 市建局浪费公帑

新闻资讯 > 地产新闻 返回
浏览人次 : 8471
地产新闻
安置屋十室九空 市建局浪费公帑
(太阳) 2015年4月11日
香港真奇怪,呢头一屋难求,连厕所劏房都争崩头,嗰头有屋冇人住,长期丢空养蚊,讲起都冇人信。

唔系讲笑,为咗安置受市区重建影响嘅租户,市建局嘅前身土地发展公司早年以兴建或收购嘅方式,为住户提供安置单位,租金从优,部分甚至低至市价两成几。呢啲安置楼宇全部位於市区,包括大角咀、深水埗、旺角同西环,虽然旧咗啲,但胜在又平又就脚,本来应该有爆棚之盛至系,点知空置率一直高企,冷冷清清,凄凄惨惨。

好似一幢位於大角咀嘅安置大厦咁吖,总共四十几个单位,入夜后只有十几个单位着灯,其余单位乌灯黑火,成幢楼好似「闹市鬼域」咁。有居民话,印象中有人搬入嚟住已经系三年前嘅事咯。

咁都未算吖,旺角豉油街有幢安置大厦,夜晚仅一成单位有灯光,即系话九成单位冇人住。其他嘅亦唔好得去边,深水埗荔枝角道嘅安置大厦唔止住宅单位十室九空,连楼下地铺亦丢空。正如有住户质疑,隔篱单位十五年都冇人搬入嚟,「点解唔畀人住」?

系咯,今时今日房屋需求殷切,连厕所劏房都成为抢手货,无壳蜗牛唔理好丑,但求有瓦遮头。点知市建局嘅安置屋就大量丢空,简直系暴殄天物,浪费资源。有身兼市建局非执行董事嘅立法会议员指出,呢类大厦受到地契等限制,只能安置受重建影响嘅居民,之不过咁,现时土地资源弥足珍贵,当局应以临时方式出租畀有需要居民,以纾缓愈来愈严重嘅住屋问题。

冇错嘞,制度系死嘅,人系生嘅,既然安置屋长期丢空,点解唔灵活变通,以求物尽其用呢?讲到底,都系一个「懒」字了得,政府部门又好,公营机构又好,一向抱住「多做多错、少做少错、唔做唔错」嘅心态,懒得就懒,得过且过。试谂吓,如果呢啲楼宇属於官老爷自己嘅,会唔会长期丢空吖?

话时话,港产官僚浪费房屋资源早就唔系新闻,审计署之前发表报告透露,七百几个高级公务员宿舍中,近两百个「过剩」,加上各部门持有近五百个未用过嘅宿舍,总共有七百个宿舍单位无人住,部分甚至已经丢空十五至十七年,问你服未。美国前总统列根话过,政府唔能够解决问题,因为政府本身就系问题。真系一啲都无讲错,叮!