近年楼价喺辣招打压下依然升势强劲，睇番差饷物业估价署截至二月底最新数字，私宅售价指数按月再升约2.3%至291.1点，屈指一算已经连升十一个月，又创历史新高。再睇番一三年二月推出双倍印花税措施嗰阵有240点，原来楼价两年升咗约莫21.3%，各区实用面积431方尺以下上车细单位，两年间升咗约15.4至30%不等。最新实用尺价报约9,886至13,648元，齐创历史新高，难怪市民系咁呻上车难啦。
刘Sir睇返差估署最新嘅数字，二月私宅售价指数报291.1点，再创下历史新高。
以地区同埋实用面积划分，港岛、九龙同埋新界实用面积431方尺以下细单位全线报升，按月升幅约1.5至3.3%，尺价报约13,648、11,039及9,886元，齐创历史新高。
原来唔经唔觉呢啲上车单位嘅实用尺价已经升到咁高，除咗九龙区升穿咗万一元，新界区都逼近一万元水平，难怪政府喺今年二月底要推加辣招遏抑楼市。
私楼租金升足一年
事实上，政府对上一次出招已经系一三年二月，刘Sir知道，私宅售价指数当时报240点，即系话楼价两年升咗约21.3%，新界及九龙区细单位尺价升幅跑赢大市，累升约30%及26.1%，而期间港岛细单位就升咗约15.4%。
至於租金方面，亦随着楼价上升，该署资料显示，二月份嘅私宅租金指数按月上升约莫0.5%，去到167.8点，升足十二个月。
港岛铺租冧22%惨情
此外，近排零售市况转弱，二月份港岛区私人零售铺位尺租大约112元，按月大跌10.7%，比起一年前更劲跌22.5%，系唯一过去一年录得跌幅嘅地区。
九龙同埋新界区铺位尺租就约134元及122元，分别按月跌咗3.1%及上升19.8%，按年比较就升约6.3%及16.5%。
刘Sir最近去开元朗，见到经营胜利牛丸超过三十年嘅老板胡先生，佢话旗下康乐路分店早排已经不敌加租结业，租金由原来嘅9万元加至15万元，只好无奈结束，现时喺区内只余下两间分店。
刘Sir
App下载
