香港人咁紧贴楼市行情，呢排更热烈讨论「细价楼爆煲论」，试问点会唔识楼市专家林一鸣博士吖！喺孖妹心目中，佢已达到男神级数；神在佢投资精准、口才了得之余，仲识写金融小说。难得今次同男神Q&A，试吓考佢投资心法之外，亦一於八卦到底，代各位姊妹发掘佢鲜为人知嘅一面。
林：资深金融业人士 林一鸣
讲炒股：技术分析嘥气 要识「听话」
Kitty：今次我哋就明正言顺咁问你攞「贴士」！波浪大师你咁忙，仲有无时间「捉浪」先？
林：A股持续上涨，「托住」本来已进入熊市A浪嘅港股，呢个情况第一次见，搞到港股波浪形态又乱又怪、唔会好似以前咁明显。我相信中、港股市今年会继续背驰，A、H差价愈来愈大，最惨就系炒AH差价收窄嘅人，会发觉愈炒愈输。
仲有，以前投资可以睇基本因素，但依家步入政策市，最重要系睇消息同中央领导层嘅说话，所以事前嘅预测、分析真系完全嘥气。我建议大家多啲接触（了解）国情会更有用。近年我投资部署都数少咗浪；相比以前，依家数浪嘅准确度低咗好多。
快炒国策股有技法
彩儿：睇嚟股友日后都好难再靠炒股发达。
林：系非常困难！相信「快炒国策股」先系今、明两年最好嘅策略，吼准内地新政策刚推出时就买入受惠板块或个股，趁板块上涨就获利离场，一年捉到几个呢啲机会已经够。好似早前内地「两会」炒起嘅新能源及互联网股，以及近日受刺激做好嘅「一带一路」概念股；预期「十三•五」计划会陆续出台，系下一轮炒国策股嘅黄金机会。不过你问我四、五月出咩政策，真系天才都估唔到。
Kitty：你投资经验咁丰富，会唔会收埋咗啲绝世武功，唔话畀我哋知o架？
林：我教你哋呢套投资策略，自己都用紧！例如我睇好今年A股仲有得升，沪综指有望冲上4,000点，所以我五成以上资金都系买A股或相关投资。港股就无办法啦，升唔上又跌唔落，惟有拣板块炒。估计恒指全年会跌5至10%至大约20,000点。
讲写作：写财技小说怎样找灵感？
Kitty：听闻你转工后懒咗喎，无再朝朝跑步返工呢！
林：无喇，新公司唔喺港岛区，无得由屋企跑步返工，一系要早到五、六点起身跑先得，咁惟有喺周末跑多啲补数啦。我平日工作好忙，夜晚放工又想返屋企陪吓家人，到十一点左右又要写专栏同财经书。但我依然钟意跑步时嘅专注感，因为跑跑吓会谂到好多嘢，就连我本新书《财技风云》入面一半内容都系跑步时谂到。
彩儿：你本新书我一早睇完喇！推出唔够两个月已经加印再加印，睇嚟大家对金融小说好受落。
林：最初都怕读者唔受落，估唔到反应咁好。我以前写过好多财经书，今次想搞搞新意思，而且内容涉及孖展、配股、供股等较深概念，一般散户难明白，所以希望小说形式会令读者更易吸收。书中嘅知识都系自己多年嚟累积嘅经验同所见所闻，人物、情节全属虚构，但要将几十样财技知识串埋喺同一个故事，又要情节通顺，真系好高难度。本书已经卖出约5,000本，依家已经开始筹备续集。
作家收入差过最低工资
Kitty：你投资咁劲，估唔到都写得一手好字喎。其实你暗哑底系咪半个「文青」？
林：我由细到大都好钟意睇书、写嘢。对於我嚟讲，炒股、买楼只系交易，系生活嘅一部分，好难变成兴趣。做作家虽然金钱回报少，但带来嘅满足感最大。可惜喺香港，单靠做作家搵食都几惨。二、三十年前、倪匡嘅年代都仲可以靠写作生存，但依家只有一至两成嘅书可以卖过千本。假设个作家好叻，分到10%以上版税，但其实收入只得万几蚊。计番写作时间，应该低过最低工资。
彩儿：不如你搞个签书会啦，你啲拥趸一定好开心。
林：搞签书会好奇怪喎，虽然自己未搞过，但试过喺书展期间出席座谈会，通常啲人听完后都系想问「冧巴」，唔系好关心本书，哈哈。
讲买楼：楼价虽癫 唔代表快爆煲
彩儿：咦，我记得你系楼市大好友，睇本港楼价今年再升5至10%，系真唔系啊。
林：无错。虽然依家楼价好癫，但讲「爆煲」似乎太早。要楼市短期大冧，一定要有班人突然间受客观环境影响而逼住劈价卖楼。但目前香港人对住屋需求好大，估计楼价会继续干升，只系成交会下跌。
Kitty：近日大家对80、90后嘅上车故事有好大回响。你都曾经后生过，当年嘅你系咪都觉得一定要有楼揸手？
林：完全唔系，不过，对於年轻一辈嘅无奈我绝对理解。我廿四、五年前毕业第一份工，同依家大学生嘅人工系一样，但楼价就升咗10倍8倍。以前嘅年轻人对前途会有信心，知道只要努力就有出路，每年人工升几十个百分点，毕业后打四、五年工已经买到楼，而且400万元已经买到半山1,000尺豪宅。但依家嘅年轻人欠缺向上游嘅环境，就算几努力，十年后都只得万几二万蚊人工，要上车真系Mission Impossible，条数点计都计唔到。
毕业10年想买楼？ 好难
彩儿：希望日后到你囝囝买楼时，楼价唔会再咁癫啦。
林：老实讲我唔系太担心，大家都明白有句叫「成功靠父干」。其实尽量都唔想帮小朋友畀首期，但好客观讲，咁嘅楼价，如果本身无任何资产、无任何父母资助，毕业后10年内要买到楼非常困难。
Kitty：咁你炒楼系咪次次Win？
林：我都试过蚀住走，但蚀幅少过一成，最庆幸自己喺○三年沙士前走得切。当时我仲喺银行做，比较贴近市场，见身边个个都炒楼，feel到有唔妥，所以○一年左右决定将手上所有物业卖出，好好彩避过一劫。直至○四年三月我先再入市。
彩儿：静静鸡话你知，其实我有成百万私己钱，但唔想用嚟买「姑婆屋」，有无其他方法滚大佢？
林：各位学嘢喇！
Kitty、彩儿
App下载
