近排零售市道麻麻，市场都睇淡铺市，但唔少投资者反而会趁机入市，事关业主叫价都无咁强硬。刘Sir发现铺位投资者黎永滔最近就以7,500万元买咗佐敦弥敦道227号及庇利金街38号嘅一楼同埋二楼，亦即系以前老牌酒家北京酒楼嘅旧铺址，其实喺两年前个铺曾经以8,050万元卖出过，但后来取消咗交易，而喺上年底个铺市场估值就约1亿元，依家低约两成半卖出。
睇返土地及公司注册处资料，弥敦道227号及庇利金街38号嘅金百龙大厦一楼同埋二楼卖咗7,500万元。
新买家系GOLDEN INCOME（HK）LIMITED，公司董事包括黎永滔等，与黎姓铺位投资者同名。
资料仲显示，原来喺一三年，个铺曾经以8,050万元卖过一次，但之后就取消交易，喺去年底再放售，听闻市值约莫1亿元，依家成交价平咗约两成半。而原业主就喺九○年以1,080万元买入物业，计一计，个铺期间升值近六倍。
原来黎永滔本身持有弥敦道227号及庇利金街38号地下两个铺位，仲喺一三年嗰阵招标过，当时两个铺市值加埋逾5亿元。
高威阁25车位极速沽
另外近排车位买卖交投唔错，港置陈伟材话，由资深投资者陈秉志持有嘅柴湾高威阁50个车位，寻日首日发售，不足半小时沽咗25个，最高售价接近150万元。仲有消息话，有个大手买家一口气认购咗18个车位，涉及至少2,000万元。
而受近月「反水货」活动影响，该行林伟文预计，短期内受影响区域铺位交投步伐减慢，但就仲未见业主减价减租，料今年民生区铺位售价都仲可以上升10%，而租金则上升5至10%。
另消息话，旺角西洋菜南街双号地铺，面积约1,700方尺，以约110万租出，与旧租金相同。而该行黄宝伟话，活化政策即将暂停，料投资者赶入市，今年工厦售价同租金会分别升10%及5%。
商厦料今年价升一成
商厦方面，该行郭汉钊话，喺沪港通带动下，预计今年核心区商厦租务成交由中资机构主导，占核心区租赁约六成半，整体商厦售价及租金今年均至少升10%。
另中原唐苑雯话，尖沙咀新文华中心A座8楼12室，面积约1,788方尺，以约1,800万沽出，尺价约10,067元。
刘Sir
App下载
