楼市出更:中港超富豪最爱买楼

新闻资讯 > 地产新闻 返回
浏览人次 : 7768
地产新闻
楼市出更:中港超富豪最爱买楼
(太阳) 2015年3月6日
全世界都知香港豪宅出名贵,但唔揸番几间又点衬得起超级富豪嘅身份。刘Sir睇过莱坊同中银国际发表嘅二○一五年《财富报告》,旧年拥有资产净值3,000万美元或以上嘅内地同香港超级富豪,平均每个人手持4.7间及4.6间豪宅,系全球最多首两位,明显比起全球平均只持有3间多,而香港身家超过10亿美元(约78亿港元)嘅顶级富豪旧年就有53人咁多,系亚洲城市中居首。

刘Sir知道,呢个财富报告系调查咗全球97个国家,共107个城市,喺旧年平均每日就有约15人加入资产净值3,000万美元或以上超级富豪呢个行列。

物业投资占比38%

呢班超级富豪愈来愈注重将物业视为主流投资类别,就亚洲区超高资产净值人士嚟睇,物业占佢哋嘅投资组合中平均38%,有22%受访者都话喺旧年增加咗物业投资比重,而内地同香港嘅超高资产净值人士,平均每人有4.7间及4.6间豪宅,包办全球首两位。至於资产净值超过10亿美元嘅顶级富豪,旧年香港就有53人,系亚洲城市中最巴闭。

报告提到全球资产净值3,000万美元或以上嘅超级富豪,喺未来十年会增加约34%去到近23.1万人,莱坊纪言迅话,到时香港超级富豪人数会增加约47%至3,941人,而中国更会大升约87%,去到约15,681人。

另涵盖全球100个主要城市嘅莱坊国际豪宅指数,旧年全球豪宅价格平均升2%,升幅较一三年的2.8%为少。

港豪宅价世界第二

其中美国纽约豪宅价格去年升18.8%最多,而香港受到楼市政策影响,豪宅价格只升约1.1%,排第56,不过价格就维持喺全球第二位,每100万美元只能够买到215方尺香港豪宅,计番港纸每方尺超过3.6万元。

莱坊报告指,中国成为全球「富翁出口国」。截至一三年嘅十年入面,移民或者获海外公民身份嘅中国富翁超过7.6万人,澳洲系中国富翁移民首选地,喺截至一月嘅两年内,该国重要投资签证申请者入面,中国人占比逾90%,达1,384人。

刘Sir