楼市出更:财团弃扫旧楼宁投地

新闻资讯 > 地产新闻 返回
浏览人次 : 9240
地产新闻
楼市出更:财团弃扫旧楼宁投地
(太阳) 2015年2月16日
政府推咗辣招税之后,发展商旧楼收购活动明显转慢。旧年强制拍卖成交个案只得12宗左右,但交易金额仍然超过62亿元,反映到并购项目规模较大。测量师老友同刘Sir讲,今年申请强拍嘅地盘比往年少,预计以后每年强拍个案大约有10至12宗左右,主要喺发展商舍难取易,转为加大力度入标投政府地皮。

刘Sir知道,旧年通过强制拍卖成交嘅个案,虽然成年只得12宗,但涉及嘅交易金额都唔细,有成62.1515亿元。喺12宗成交个案中,强拍常客恒地(00012)占咗一半,有6宗,计下条数,占全年强拍交易金额约68%。

去岁西环大楼最瞩目

如果睇返旧年嘅强拍个案,成交金额最大喺恒地西区西环大楼项目,旧年十一月喺无竞争对手下,以底价29.57亿元投到。呢个项目恒地喺○九年已经开始密密收购,令到持有项目嘅业权份数去到约96.7%,不过到统一业权历时长达五年之久,真喺唔容易。

刘Sir收到风,呢嗰项目总投资额约45亿元,会重建成一幢38层高嘅商住物业,地盘面积约29,875方尺,预料提供600个住宅单位,以细单位为主,有机会喺一六年以楼花形式开卖,估计一八年底落成。

另外,值得一提就喺鰂鱼涌吉祥大厦,新世界发展(00017)、周大幅以及相关私人财团,经过几年时间,六次强拍,终於喺旧年六月份,最后一次强拍,以底价4.21亿元成功统一余下业权,据了解,六次强拍涉资共约12.25亿元。

今年暂仅录一宗强拍

第一太平戴维斯估值及专业顾问董事总经理陈超国话,近年政府主动卖地,令发展商投入资源投地。而政府推辣招税后,小业主叫价较以往硬净,增加收购难度,同时亦令收购旧楼嘅成本大增,而家发展商收购旧楼已无咩肉食,发展商同政府买地仲悭水悭力。

陈超国仲话,今年强拍个案维持10至12宗水平左右。事实上,刘Sir计下条数,今年到家,都只系得1宗强制拍卖成交,就系由恒地以底价2.4亿元投到嘅九龙西洋菜北街456、456A、458及458A号旧楼。

刘Sir