新聞資訊 > 地產新聞 返回
瀏覽人次 : 4012
地產新聞
婚姻與置業掛鈎 麵包比愛情價高
(東方) 2018年7月13日
「有樓有女,冇樓冇女」已經係今日香港嘅寫照,唔好怪港女現實,事關無論乜嘢年代,安居樂業先係最重要,連安樂窩都冇,仲講乜嘢成家立室呢。可惜吖,房屋問題係老大難問題,香港上樓比上青天更難,難怪剩男剩女愈來愈多。

嗱,有交友配對公司訪問咗六百多名港男港女,絕大部分男女都認為置業係必須,超過六成女士期望另一半最好或必須有物業,認同異性擁有私樓會加分。另外,超過七成男士認為有樓會較易識女仔,近半男士深信擁有愈大額物業,識女朋友嘅機會愈大。

調查結果一啲都唔令人意外,好似雀仔咁,雄鳥除咗以鮮艷羽毛博取雌鳥歡心,仲會送上鳥巢作為求偶禮物,連動物都識咁諗,萬物之靈嘅人類又點會例外。試諗吓,一男一女組織家庭,連個遮風擋雨嘅竇口都冇,點掂呀,唔通真係有情飲水飽,瞓街咩。之前有港女喺電視節目爆出「有樓有高潮,冇樓唔好白撞」嘅驚人金句,雖然粗鄙,但如果唔因人廢言,未嘗唔係反映現實o架。所以話,你有壓力,我有壓力,港男壓力真係唔嘢小。

係呀,香港地就係咁現實。尤其係今日樓價競比天高,不論男女都好,只要有樓揸手就自動成為人生勝利組,唔愁冇得揀。就算退一萬步講,買唔起私樓、居屋都唔緊要,只要上到公屋亦一世無憂。唔係講笑,有年輕家庭因為幸運地上到公屋,一年去幾次旅行唔在講,仲可以放膽生仔,家庭成員多咗,又可以換大單位,幾爽呀,可惜公屋供不應求,幸運兒只佔少數啫。

諗起都悲哀,房屋明明係生活基本需要,偏偏喺香港成為奢侈品同身份象徵,有樓代表成功,冇樓代表失敗,大把人為層樓捱生捱死,一世為發展商同銀行打工,正如電視劇經典對白話齋,「咁叫做公平咩?」講到尾,咪就係港府無能囉,咪就係高官涼薄囉。咪睇林鄭講到自己幾咁重視房屋問題,一言以蔽之就係嫌貧愛富,連新建公屋都要轉為綠置居發售,有錢住新樓,冇錢住舊樓,話之公屋輪候大軍等到頸長。至於最近推出嘅「三目標、六措施」,統統以置業為主導,對冇能力置業嘅年輕人不屑一顧,唔係嫌貧愛富係乜吖?

時間唔等人,香港人口老化不斷加劇,同時剩男剩女達到廿幾萬之眾,適婚人口無法成家,遑論生兒育女,再咁落去,香港仲邊有活力同競爭力o架?唔該林鄭咪淨係識顧住業主利益,都要望吓買唔起樓嘅一群,再唔諗辦法增加土地及房屋供應,社會矛盾只會愈演愈烈嘅咋。