絲絲講場：貓狗奴上車盤多選「宅」

「貓奴狗奴」要服侍主子，置業或租樓都要千挑萬選，因為香港可以養寵物嘅住宅唔多。

不過，有地產代理用咗超過一年時間，查詢全港超過1,031個屋苑及大廈嘅管理公司，發現原來有435個確認可以養寵物，佔約四成。

港島及新界比例較高

毛城城置業業務拓展總監陳展文同絲絲講，上述調查確認可以養寵物嘅物業中，52個為港鐵物業，有20個可以養「毛孩」，比例亦近四成。佢仲話，樓齡十年以下嘅屋苑，高達七成可以養寵物添，而港島及新界區比例亦較高。

佢哋將以上名單收錄喺全港首份《可養寵物屋苑及大廈名冊2018》，放喺網站畀公眾查閱。

該網頁顯示，唔少大型屋苑都可以養寵物，如港島區包括小西灣藍灣半島及北角城市花園；九龍區方面，有紅磡黃埔花園及九龍灣德福花園等。而新界區名單中，有沙田中心及馬鞍山新港城1至3期。

不過，仍然有部分大型屋苑唔喺名單入面，例如鰂魚涌太古城、沙田第一城及天水圍嘉湖山莊等。

愈來愈多市民養「毛孩」，有代理業界人士承認，過往查詢買賣放盤或租盤客戶中，十個就有約一、兩個係寵物主人，佢哋會先了解屋苑可否飼養小動物。

余絲韻