新聞資訊 > 地產新聞 返回
瀏覽人次 : 4360
地產新聞
哪吒怪招 倡首置用計分制
(東方) 2018年1月3日
屢敗屢戰嘅西貢區議員方國珊(哪吒)呢排密密做宣傳,似乎對立法會新界東補選蠢蠢欲動!運輸及房屋局常任秘書長兼房屋署署長應耀康尋日到訪西貢區議會,不過哪吒好似唔知運房局點分工,以為運輸都歸應耀康管,搞到應耀康要開聲澄清係一局分兩科。哪吒仲提倡喺安達臣道嘅首置上車盤唔好用攪珠,要用計分制喎,聽到應耀康眼都凸一凸!

應耀康否認綠置居恒常化

哪吒解釋,話買資助房屋唔係買六合彩,攪珠講運氣,計分制就唔同,可以將啲資源撥畀有需要嘅居民。咁點計分呢?佢話要學吓外國,計吓對香港有幾多貢獻,而且應該鼓勵年輕人同長輩或父母住。佢又鬧假難民留港呃飲呃食,話有街坊喺超市工作,成日見到有酷刑聲請者攞食物券去買阿拉斯加長腳蟹,又買魚生,食得好豪,所以佢好支持遣返聲請者,「應該早啲一腳兜走佢哋」,又鬧留港唔係有需要嘅人「正契弟」。

另外,有多個政黨喺會議開始前各就唔同議題向應耀康遞請願信。會上亦有區議員擔心綠置居恒常化會影響公屋輪候時間,特別是沙田火炭約四千八百個公屋單位變為綠置居。應耀康則予以否認,重申需與房委會商討先決定綠置居係咪恒常化,重申綠置居可讓住喺公屋同輪候冊中有能力嘅人士置業。