新聞資訊 > 地產新聞 返回
瀏覽人次 : 2911
地產新聞
買居屋如中彩票 欲上樓難於登天
(東方) 2017年8月25日
「阿媽,我得咗喇!」呢句陳年口頭禪相信係唔少居屋買家嘅心聲,事關今時今日上樓仲難過上青天,尤其係居屋申請動輒超額幾十倍,有幸中籤兼成為首批揀樓人士,難度堪比中六合彩o架

強颱風「天鴿」吹襲本港,新一期居屋延至尋日揀樓,但一樣無阻揀樓人士嘅興奮心情,其中一位選購彩虹彩興苑單位嘅男士喜形於色,話之前三次抽居屋都抽唔中,今次得咗,終於可以同女朋友拉埋天窗嘞。至於另一位選購梅窩銀蔚苑嘅教師就坦言,家陣想搵六百萬樓下嘅上車盤基本上係唔使旨意,即使梅窩交通冇咁方便都惟有照殺喇。

咁又係呀,樓價高處未算高,唔止一手樓售價驚人,就連二手樓平均售價都升至近七百萬元史上新高,二、三百萬嘅居屋成為搶手貨,一啲都唔出奇。好似呢批位於彩虹及梅窩嘅居屋咁吖,前者有噪音問題,後者位置隔涉,但一樣爭崩頭,超額申請逾四十八倍,申請者要過五關斬六將先至能夠成為買家,唔開心就假。問題係新居屋單位只有二千餘個,相對數十萬無殼蝸牛,直頭連杯水車薪都稱唔上囉。

講起就唏噓,住屋明明係市民基本生活所需,偏偏喺香港變成高不可攀嘅奢侈品,居屋買家只係少數嘅幸運兒咋,就連危機四伏嘅劏房,租金動輒六、七千元起跳,好多基層早已負擔唔起。就算係大學畢業生,有正當職業兼唔飲唔食,「冇父幹」嘅話,上樓一樣遙遙無期。小學雞政客話年輕人連扑嘢嘅地方都冇,如果唔因人廢言,都唔係冇道理o架,愈來愈多年輕人走上街頭,咪就係房屋問題變成政治問題嘅寫照囉。

難為港府將協助年輕人置業掛喺口邊,講咗N年,有乜實際成績先?就講青年宿舍吖,出發點唔係唔好,但六個選址只提供二千幾個單位咁大把,部分仲要五、六年後先至落成,蚊都瞓蛇都死喇。再講吖,想置業嘅點止年輕人,好多家庭都好心急上樓,但實情係公屋輪到死,私樓貴到死,捱生捱死都係兩頭唔到岸。港府諗到冇嘢好諗,學人搞咩「良心劏房」喎,簡直唔知醜字點寫。

講嚟講去,惟有增加房屋供應先至係正路,可惜吖,港府拓土建屋寸步難行,而且係都要棄易取難,捨近求遠,唔係打填海主意,就係郁郊野公園用地,即係自尋煩惱啫。港府家陣又話要成立專家小組,就拓土凝聚全民共識喎,怕就怕築室道謀,三年無成,重蹈「議而不決、決而不行」嘅窠臼。冇符喇,舊政府冇靈魂,新政府又係冇靈魂,仲話「好打得」,吹牛唔上稅吖嘛!