新聞資訊 > 地產新聞 返回
瀏覽人次 : 5186
地產新聞
霆鋒父親節送巨禮8,500萬淺水灣豪宅
(東方) 2017年6月1日
本月18日是父親節,不少孝順仔女都會買禮物冧爹哋,身家億億聲的影星謝霆鋒豪擲8,500萬港元購入淺水灣一個近二千呎的望海景單位,送給80歲父親謝賢!經理人Mani指霆鋒向來有孝心,至於甜在心的謝賢貫徹低調作風,只說:「使咩張揚!」

謝霆鋒向來孝順父親「四哥」謝賢及母親狄波拉,身家豐厚的他不時送厚禮給父母,霆鋒一直視謝賢為偶像,年前奪金像獎影帝時在台上向父親致謝兼道歉,早前拍攝飲食節目又大玩「Chok蕉」向父親致敬,之後兩父子在外地冒雪拍片笑住分享昔日快樂時光,一唱一和感情要好!

老竇愛看海

父親節將至,孝順仔女都會花心思送禮報親恩,霆鋒今年的父親節禮物特別大份,以8,500萬港元購入淺水灣道低密度住宅怡峰一個望海景單位,送給年屆80歲的謝賢,單位實用面積約1,939方呎,為兩房兩廳連一個套房間格,實用呎價約4.38萬元。土地註冊處資料顯示,該單位易手買家為謝家鈺(Tse Ka Yuk Patrick),與謝賢的原名相同!

本報向霆鋒經理人霍汶希(Mani)求證霆鋒是否買豪宅贈予四哥?Mani說:「佢唔會回應,不過據知呢層樓十成十都係佢送喇!霆鋒一向好孝順,前幾年買咗500萬嘅勞斯萊斯畀爹哋,佢又知道四哥鍾意望海,所以送呢個有海景嘅單位都唔出奇!」記者再致電謝賢恭喜,雖然屬開心事,但他保持一貫低調,認為不需要張揚:「咩喜訊?使咩張揚!(真係買咗呢個單位?)係又點?唔係又點?(係咪想買個大嘅單位,可以同家人食飯都闊落啲?)唔好再問啦!」隨即收線。

送名車出入

投資有道的霆鋒手執市值約5億元物業,年前更成為中環擺花街舖王,早年他出售謝賢居住多年的金徽閣單位,淨賺2,000萬,其後為父親物色安樂窩,安排他入住月租10多萬元的半山豪宅陽明山莊,至最近終再扑槌購入淺水灣海景豪宅氹老父,認真大手筆!除了住屋,霆鋒年前亦豪花500萬元買入黑色勞斯萊斯名車送給謝賢代步,又以20多萬元投得「RR4」車牌,以配合四哥之名,再聘請司機接載出入,窩心爆燈,絕對是圈中超級孝順仔!