農莊劏房無王管 土地問題成死結

新聞資訊 > 地產新聞 返回
瀏覽人次 : 5566
地產新聞
農莊劏房無王管 土地問題成死結
(東方) 2017年5月4日
「開荒南野際,守拙歸園田。方宅十餘畝,草屋八九間。」陶淵明《歸園田居》嘅呢幾句詩膾炙人口,不過用嚟形容今時今日香港就頗有諷刺意味,事關無殼蝸牛為求有瓦遮頭,只要租金夠平,唔理好醜,但求就手,結果咪搞到農莊改建嘅劏房遍地開花囉!

話說屯門有農莊將約六千平方呎農田劏成約廿間「民宿」農莊,呢啲劏房係就係夠平,二百平方呎月租千五蚊有交易,一百五十平方呎連小花園嘅農夫屋,月租亦只不過二千二百蚊,之不過睇真啲,所謂「民宿」其實只係一間殘破鐵皮屋,裝修、家具、冷氣等應有盡冇,「沖涼房」得條水喉,連門都冇裝,洗手間更加要同其他租客共用,都咪話唔淒涼。

環境差仲係其次,最弊係有法律同消防問題。法律界人士係咁講嘅,喺農地搭建構築物本身已經違反地契規定,以日租或月租形式出租更明顯違法;萬一喺違規農地上發生意外,住客即使買咗保險,分分鐘都冇得賠o架。

不過你咪理,農莊「民宿」有價有市,每逢夜晚更加係燈火通明,儼然小社區,不知幾熱鬧。本報記者現場直擊,淨係呢條村啫,其中兩、三幅農地已被闢為劏房出租,可想而知有幾渴市。始終都係嗰句,有頭髮冇人想做瘌痢,住得呢類劏房嘅好多都係攞綜援、輪候緊公屋嘅基層人士,唔跪地餼豬乸,唔通走去瞓天橋底咩!

呢嗱嗱嗱,呢個正正就係問題癥結所在。劏房問題積重難返,點解當局長期視而不見?港產官僚做嘢求求其其,得過且過,固然係主要原因,特別係地政總署同寮管處,啱啱至畀審計報告狂炳,針對違規建築物執法甩漏多多,令違規情況愈演愈烈。但當局講唔出口嘅係,家陣公屋等上樓條龍仲長過萬里長城,拉人封舖咯喎,點樣安置住戶先?咪惟有隻眼開隻眼閉囉。總而言之,最緊要冇死人冧樓,官老爺唔使孭鑊,至於蟻民住豬欄定雞棚,咁就你死你賤,貴客自理嘞。

唔係老屈o架,運輸及房屋局局長張炳良就曾經講過,取締所有劏房不切實際,只要劏房冇違法就可以繼續存在。香港作為全球數一數二最富裕城市,一方面唔少人住得仲差過第三世界嘅貧民,另一方面好似劏房波咁嘅業主賺到盆滿缽滿唔在講,仲步步高升,做完局長做司長,不知幾過癮。人比人比死人,唔恨得咁多嘅喇。

講嚟講去,一日最衰都係港府拓土不力。人總係要有地方住,房屋問題死結一日唔解,呢類違法兼危機四伏嘅農莊劏房只會愈嚟愈多嘅咋。