港獨歪風氾濫成災，有人口口聲聲「香港不是中國」，又叫囂香港人要「民族自決」。係人都知，「香港民族」呢啲口號純屬無稽之談，不過香港會唔會誕生一個「長頸族」咯喎，就真係冇人話得埋嘞。
唔係講笑o架。根據生物學嘅「用進廢退」理論，生物經常使用嘅器官會逐漸發達，長頸鹿為咗覓食，條頸向高空發展，就係典型例子。正如香港人一樣，乜都要等一大餐，你話條頸有乜法子唔愈來愈長吖。根據房委會最新數字，截至九月底公屋輪候冊累積申請近廿九萬宗，平均輪候時間延長至四點五年，再創歷史新高，亦同平均三年上樓嘅承諾距離愈來愈遠，問你怕未。
話時話，每次公布公屋輪候平均時間，例牌都係歷史新高，上次係四點一年，再再上次就係三點九年，增幅愈來愈大，都咪話唔得人驚。唔好忘記，申訴專員公署曾踢爆當局篤數，連長者優先及凶宅配屋都計埋入去，力求「縮短」平均輪候時間，可見所謂輪候四年半都係粉飾太平嘅啫，如果唔係，被迫棲身劏房嘅人口就唔會年年增加喇。
對於公屋輪候時間再創新高，連房委會都打定輸數，預料未來幾年將進一步拋離三年上樓目標，依家唯一可以做嘅，係進一步收緊富戶政策，以加快公屋單位流轉咁話。
講真，騰出公屋畀有需要人士，冇人會反對。大家不妨去嗰啲富貴屋邨行番轉，名車泊到通街係，仲有嗰啲薪高糧準嘅立法會議員，居然霸住公屋單位唔走，就知道公屋被濫用嘅問題幾咁嚴重。問題係當局話要收緊富戶政策，已經講咗N次，以往一直做唔到，現屆政府弱過藥材舖，更加咪使旨意喇。
再講吖，所謂「富戶」都有好多種，上述揸名車又或者尊貴議員一類「超級富戶」，到底有幾多呢？如果交還單位少，止到痕止唔到咳；交還單位多呢，呢班「富戶」有冇能力置業，又係另一個問題。政府最新數據顯示，九月份整體私人住宅樓價創三年幾以來最大單月漲幅，價格逼近舊年高峰。有人甚至認為，差估署數據時間上有滯後，實際上家陣已經超越樓市「癲峰」，可以想像，如果一大批「富戶」加入搵樓大軍，私樓供不應求嘅情況只會進一步加劇。
真係愈講愈火滾，今屆政府口號多多，又話用「洪荒之力」增加供應，又話房屋問題係施政「重中之重」，依家「重中之重」冇份，市民「慘上加慘」就有之！如果千百年後，人類學家真係喺香港發現「長頸族」遺迹，都係今屆政府好帶挈嘅咋！
App下載
