主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 8612
地產新聞
空間太細最不滿 房屋悲歌唱不完
(東方) 2016年8月24日
記得有位前高官講過,細個時一家五口逼喺百零呎嘅板間房,仲要同另外四伙人合用廚房廁所,後來好好學習,天天向上,終於出人頭地。可惜吖,呢啲勵志故事只係少數,大部分香港人仲住緊豆腐膶咁細嘅蝸居,真係講起都一殼眼淚。

有團體訪問全球廿二個國家同地區嘅網民,結果發現香港受訪者喺改善居所整體面積及設計、儲物空間,以及如何更妥善組織家居設施等三項期望,分別佔五成、四成七以及四成,比例係全球最高。講真,呢個結果一啲都唔出奇,有人計過數,同十年前比港人平均居住面積縮水一半,仲遠遠跑輸北京、台北、新加坡以及東京等大城市添。

周星馳笑片有句經典對白︰「呢個表面係一個風筒,實際上係一個鬚刨」。其實香港人啲傢俬都係一樣,表面係一張梳化,實際上係一張床,同時亦係一個櫃桶。冇計喇,地方淺窄,惟有偷盡每吋空間,裝入牆衣櫃、加高地台,「僭建」閣仔等固然唔少得,有人甚至喺廳裝多幾塊鏡,等地方睇起嚟闊落啲,其實講到尾咪又係自欺欺人。

至於儲物空間,亦令唔少人傷透腦筋。男士們嘅模型、漫畫,女士們嘅靚衫靚鞋毛公仔,地方有涯而雜物無涯,掉晒又唔捨得,咁就難怪工廠大廈迷你倉近年開到成行成市,問題係呢類迷你倉消防隱患多多,一個唔好彩,分分鐘重演牛頭角長命火。仲有吖,一個人長期屈埋喺狹小空間,脾氣都零舍暴躁,好多家庭糾紛、倫常慘劇就係咁樣嚟嘅嘞。所以話,房屋問題牽一髮動全身,絕對唔講得笑。

當然喇,屋企地方再逼仄,話晒有個屬於自己嘅安樂窩,比起劏房戶算好幸福咯。今日劏房五花八門,豬欄、雞棚、貨櫃改建有之,上床下廁有之,連外國電視台都報道過,搞到香港臭名遠揚。點解劏房有價有市?仲使問,基層租唔起私樓,排隊上樓又等到天光,咪焗住硬食囉。

可能有人會話,香港地少人多,寸金尺土,房屋問題係死症,嗱,呢鋪講法要戒嘞,新加坡仲細過香港,但人均居住面積足足大一百平方呎有多,而且超過八成人住喺類似香港公屋嘅「組屋」。不過香港人唔恨得咁多喇,好簡單,淨係講填海增加土地供應,新加坡做得到,香港阻力重重,加上政府弱過藥材舖,發夢冇咁早。

難為發展局局長「劏房波」仲好意思話自己能夠完成五年任期,係唔少人心目中嘅奇迹,計功夫茶話齋,市民忍你班廢官咁耐就真係奇迹嘞。所以話,港人想改善居住環境,首先要踢走無能廢官!