主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 3716
地產新聞
樓市冰火兩重天 房策應變須及時
(東方) 2016年4月7日
成都武侯祠有副對聯,下聯係咁寫嘅:「不審勢則寬嚴皆誤,後來治蜀要深思。」計功夫茶話齋,點止治蜀要審時度勢,治港更須如此,尤其係房屋政策必須寬嚴合度,否則樓市逆轉,唔止拖累經濟民生,仲隨時演變成政治危機o架。

講開樓市問題,唔可以唔提市建局首個資助出售房屋「煥然壹居」,首日開售竟然遭遇冷場,高達七成申請人甩底,同年初錄得逾三十六倍認購率嘅火爆情況不可同日而語。市建局不得不打定輸數,話「甩底率」咁高,同市場睇淡後市有關,萬一單位最終無法全部賣出,不排除以市價發售喎。

講真,「煥然壹居」位於啟德發展區,位置理想,加上沙中線年後開通,照計對市場有好大吸引力,地產中介都睇好樓盤潛力添。殊不知近期經濟轉差,樓市下跌,區內平盤湧現,買家有大把選擇,變成皇帝唔急太監急,就算市建局作出應變措施,包括提前一個月安排揀樓,按最新樓價調整折扣率,由原定以市價八折出售修訂為八六折,都係聊勝於無,幫助唔大。

曾幾何時,香港樓市長升長有,連平時乏人問津嘅凶宅都爭崩頭,簡直唔理好醜,但求就手。好似去年初當局推出首批新居屋咁吖,超額認購六十一倍,其中白表認購更超逾百倍,中籤仲難過中六合彩,邊個諗到唔夠一年樓市就呈現冰火兩重天喎。

鬼咩,香港經濟自去年逆轉,樓市順勢調整,迄今已經跌近一成五,連地產商都唔睇好後市,有人揚言最多可能跌價三成,負資產噩夢揮之不去,仲邊有買家敢貿然入市吖。屋漏偏逢連夜雨,國際評級機構近期調低香港信貸主權評級展望,加上股市風高浪急,有「大笨象」之稱嘅滙豐跌至七年前低位,市場趨於審慎。市民一動不如一靜,留個錢傍身好過喇。

再講吖,家陣嘅樓市話就話以用家為主,剛性需求仍大,同九七金融風暴前夕炒風熾熱有明顯分別,但正如有人話齋,唔理市場需求幾咁剛性都好,亦冇可能唔受經濟大環境影響。家陣市場最關心就係港府幾時「減辣」,高官一味推說未係時候,堅持維持辣招,再拖落去,樓市會唔會進一步下挫,真係話唔埋o架。

大家一定記得,老董年代嘅八萬五政策碰上亞洲金融風暴,搞到樓市崩潰,哀鴻遍野,老董就係咁「腳痛」發作嘞;曾蔭權爵士上台後無視經濟好轉,堅持少建公屋、停建居屋,終於埋下今日房屋問題嘅禍根。所以話,一本通書讀到老並唔係辦法,因時制宜至係正路,港府聽到未呀?