主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 5576
地產新聞
富貴長者屋失敗 皆因房協太離地
(東方) 2016年3月10日
晉惠帝「何不食肉糜」嘅故事成為千古笑談,呢位昏庸皇帝因此成為不知民間疾苦嘅典型例子,估唔到今時今日居然仲有類似笑話,唔到你唔服。

話說房屋協會搞咗個富貴長者屋計劃,提供五百八十八個單位畀六十歲以上長者租住,結果反應冷淡,至今僅租出四十五個單位,出租率連一成都唔夠,可以講慘不忍睹。無可奈何之下,房協惟有調低一成租金,同時推出為期兩年嘅「短租」,希望可以吸引更多長者喎。可惜吖,尋日係減租後第一個揀樓日,一樣門庭冷落,參觀者寥寥無幾,多數長者嫌貴唔肯落疊。

點解會搞成咁?咪就係因為不切實際囉。呢個位於北角丹拿山嘅富貴長者屋「雋悅」,話就話設施齊全,除咗有中西醫診所,仲有各種家居護理及支援服務,聽落好似好吸引咁,可惜費用一啲都唔平,租住權費由百幾萬至接近一千萬元不等,其中四百幾萬元嘅單位最多,除咗租金,每月仲要支付每呎四元一角嘅管理費,同埋每人八百元嘅服務費,幾乎可以媲美豪宅,你話有幾多長者負擔得起吖?

正如有人話齋,如果有幾百萬元,不如選擇住老人院好過,每年都只係十幾萬元啫;如果唔想住老人院,亦可以喺屋企請工人服侍,點計都平過租住富貴長者屋喇。

冇錯嘞,有經濟能力嘅長者根本唔需要房協照顧,反而好多基層長者老無所依,當局就闊佬懶理,簡直係本末倒置。難為房協仲唔承認失敗,聲稱外國呢類計劃好流行,香港首次出現,好多人唔理解,需要時間消化喎。

嗱,呢啲咪就係死撐囉。所謂一處鄉村一處例,外國富貴長者屋好流行,唔表示香港亦可以流行,正如外國老人家有退休保障,而香港老人家只能望天打卦一樣,房協官僚離地,一味東施效顰,唔撞板至出奇。有長者直斥房協「嘥政府錢,好似敗家仔」,真係冇講錯(o架),家陣房屋問題咁嚴重,無殼蝸牛望樓興嘆,房協唔係諗辦法增加房屋供應,反而將珍貴嘅土地資源用嚟興建富貴長者屋,搞到唔湯唔水,唔係敗家又係乜。

不可不知,房協係公營機構,好多土地由政府以優惠價錢批出,與其阿茂整餅冇嗰樣整嗰樣,點解唔將資源放喺最需要嘅地方呢?好似房協另一個長者安居樂住屋計劃咁吖,只需支付幾十萬元就可以申請入住,結果大受歡迎,申請者大排長龍,點解房協唔起多啲呢類長者屋呢?

講到底,富貴長者屋反應冷淡,除咗反映房協唔了解長者嘅真正需要,亦反映港府嫌貧愛富,對基層長者嘅苦況視而不見。