主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 6104
地產新聞
樓市出更:羅素街舖洗牌 焗降呢
(太陽) 2016年3月3日
內地來港個人遊黃金十年已經過去,高檔零售業光輝歲月不再,唔少核心區主要街道嘅鐘錶珠寶等高檔零售商戶大減。劉Sir睇到有份報告,銅鑼灣羅素街鐘錶珠寶商戶所佔嘅舖位租賃個案比例,由一四年佔88.9%,跌到舊年得番60%,萎縮咗28.9個百分點,取代嘅商戶係化妝品店同藥房,舊年呢類商戶竟佔街道全年租務約30%。

睇番暉煌物業店舖租務嘅報告,以商品類別劃分嘅租賃個案所佔比例,舊年羅素街佔約60%租賃個案係珠寶鐘錶金飾,但比起一四年就減少咗28.9個百分點,而同街道一四年未聞租務個案嘅化妝品店及藥房,舊年反而佔咗呢條街嘅租務約30%。
一線街舖料租跌兩成

呎租方面,舊年羅素街平均呎租約1,336元,按年大跌27%,市場估計核心區一線街舖租今年租金仲會跌兩成。

若果以租賃金額劃分,舊年羅素街由珠寶鐘錶金飾所佔比例約57.6%,按年都跌咗15.4個百分點,而化妝品店及藥房錄得11.2%,按年升咗11.2個百分點,至於服裝店都升咗4.2個百分點,去到佔31.2%。

事實上,過去一年已經有唔少化妝品店同藥房進駐羅素街,好似連鎖化妝品店卓悅舊年九月就以約160萬元租咗羅素街8號地下3及5號舖位,踢走大型珠寶店,租金比之前低約42%,而連鎖化妝品店Colourmix同期以約70萬元承租羅素街18號舖位,比原租戶名錶店月租大跌六成。
旺角商戶趁平搬靚位

另外,旺角西洋菜南街舊年化妝品店同藥房租務佔約37.1%,按年升8.5個百分點,其中韓國化妝品Holika Holika由登打士街41至43號,搬到去西洋菜南街2R地下舖,月租開支由50萬元,減到36萬元,但面積就由約500方呎,增加到約800方呎,該街道平均呎租約767元,按年跌13%。

中環皇后大道中舊年佔約57.2%嘅租賃個案係珠寶鐘錶金飾,按年升咗21.9個百分點,而化妝品店及藥房去年佔約28.6%,按年反而少咗6.7個百分點;該街道去年平均呎租約718元,按年僅微升0.4%。

劉Sir