主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 4229
地產新聞
樓市出更 :下年度賣地 港島最矚目
(太陽) 2016年2月22日
下年度賣地計劃將會喺今個拜禮政府發表財政預算案後公布,依家賣地表得番15幅住宅地,市區地更只有3幅,但劉Sir覺得有機會納入下年度賣地表嘅新增供應,市區地會係焦點。預計鴨脷洲利南道香港駕駛學校,同埋堅尼地城兩幅西寧街政府地會加入賣地表,呢3幅地已經合共提供近2,000伙,初步估值逾116億元。

近年政府持續提出改變土地用途去增加供應,呢啲地皮部分有望納入下年度賣地表,劉Sir覺得會有多幅市區地喺下年度釋放,焦點係鴨脷洲利南道香港駕駛學校用地,地盤面積約12.7萬方呎,總樓面約76.21萬方呎,預計可以提供約1,416個單位。

老友高力國際張翹楚話,呢幅地係少有嘅臨海市區供應,估計每方呎樓面地價大約1萬元,估值約莫76.21億元,佢話如果唔係項目規模咁大,地價可能仲高。

至於堅尼地城亦有3幅土地將劃作私宅用途,其中兩幅規模較細嘅西寧街地皮有機會率先納入新賣地表,佔地超過2.4萬方呎嘅西寧街巴士總站用地,提供逾24萬方呎樓面,可建大約460伙。

港鐵黃竹坑站料「斬件」

另外,西寧街亨富閣毗鄰用地,可建樓面就超過4.3萬方呎,提供約莫80伙。呢兩幅地皮相信可以為庫房帶來超過40億元嘅進帳。

劉Sir推測,下年度鐵路項目供應來源有機會由將軍澳轉移到黃竹坑,呢個港鐵黃竹坑站上蓋住宅物業發展項目,佔地廣逾77萬方呎,住宅同埋商業樓面分別約384.82萬方呎及50.59萬方呎,劉Sir相信咁大件嘅項目會「斬件」推出,未必會喺下年度「晒冷」,而成個項目估值就約391.87億元。

市況差 常盛街估值縮

此外,何文田常盛街住宅地會喺今個星期五截標,由於市況較早前回落咗,理想城市調減約9%估值去到約58.6億元,每方呎樓面地價大約1萬元。

另政府賣地近年成日受到司法覆核挑戰,發展局局長陳茂波就話,如果因司法覆核而叫停賣地,會影響賣地機制同開不良先例,仲有機會畀個別人士用嚟做工具,阻礙政府及時為社會提供急需的土地供應,令整個土地供應崩潰。佢又重申政府不會賤賣土地,賣地前會審慎行事,仲會就有司法覆核嘅土地諮詢法律意見。

劉Sir