主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 4116
地產新聞
樓市出更:官舍變陣 招標抗淡市
(太陽) 2016年2月15日
政府產業署舊年趁市旺繼續出售前公務員宿舍豪宅單位,一共賣咗60個單位,涉及金額大約13.59億元,分別較一四年大增約1.6倍及約2.4倍,收入大增嘅原因係舊年以標售形式一次過售出郝德傑道8至10號46伙。不過,近期樓市轉弱,產業署今年首度推售嘅10伙剩餘宿舍單位,已經改為招標取代拍賣,並會喺今個禮拜五截標。

總結一五年,產業署透過2次拍賣會同1次招標,成功售出60伙豪宅單位,成交金額一共大約13.59億元,而一四年售出23伙,總值約4億元,即係分別按年大增約1.6倍及約2.4倍。
績佳全靠郝德傑道

該署舊年委託測量師行進行嘅兩次拍賣,每次都係涉及10伙,但兩次反應分別好大。二月初嘅拍賣會競投氣氛熾熱,嚟自薄扶林碧瑤灣及大坑愉富大廈等嘅全數單位都成功售出,套現金額達到3.2億元。

但係去到七月爆發中港股災,八月底另一場拍賣會只係賣出4伙,佔出售單位四成,成交金額只約1.38億元,反應係近年拍賣中最差,當中佔3伙成功賣出嘅單位嚟自愉富大廈。

舊年全年出售伙數同收入大增,主要因為年頭透過標售一次過賣咗郝德傑道8至10號46伙畀香港大學,涉資9.01億元。

產業署曾經因應市況一度暫停出售物業,去到一四年六月起先開始恢復賣樓,但先以招標方式推售5伙,之後先至恢復拍賣,期間同樣有兩次拍賣會及1次招標,但係推出同賣出嘅單位都較少。
因應市況調整策略

而近期經濟轉差,息口估計向上,本港地產市道不容樂觀,產業署今年亦已經改為以招標形式出售首批10伙宿舍單位,不計一籃子方式出售的單位,係超過一年半以來首次,反映政府因應市況調整出售方式,呢批單位將會喺今個禮拜五截標。

近排地產市道淡靜,劉Sir老友高力國際亞洲區估價及諮詢服務行政董事張翹楚認為,政府為免拍賣成績受現場氣氛影響,會更傾向用招標方式賣單位,但係因為政府推售單位要跟既定程序,估計今年推出單位伙數唔會因為市況有急劇變化。

(劉Sir)