主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 4035
地產新聞
樓市出更:市區無地 大鬧車位荒
(太陽) 2016年2月11日
政府近年積極搵地起樓,收番唔少市區短期租約露天停車場用地重新發展,令到車位大減,供求嚴重失衡。根據政府統計資料,上年批出嘅短期租約露天停車場,大部分都喺屯門、大埔等新界地區,市區同鄰近鐵路嘅地區批出租約佔地少之又少,只係佔整體大約三成多。

劉Sir最近綜合地政總署資料,上年全年批出可以泊私家車嘅短期租約露天停車場用地,涉及超過192.8萬方呎土地,按年增加超過三成,假設全部用嚟停泊私家車,推算一共可以提供約5,969個車位,但係市區只係佔當中1,883個或31.5%。

好似係之前有市民通宵排政府車位嘅荃灣,上年批出短期租約露天停車場,估計僅提供大約217個車位;黃大仙區更加只係得唔夠40個車位;包括東區在內嘅港島多個地區,舊年更加零供應。

反觀推算提供車位量最多的地區,都係位處新界同埋遠離鐵路,好似推算車位量最多嘅屯門區,年內批出10個短期租約露天停車場用地,估計可以提供多達1,476個車位;大埔區批出6個,估計可以提供超過820個車位,係全港第二。位列第三嘅北區,批出6個短期租約露天停車場,估計可以提供大約811個車位。

私家場租貴政府逾倍

事實上,市區私人屋苑車位租金高昂,好似係荃灣區嘅私人屋苑環宇海灣,車位月租業主叫價已經去到3,600至4,200元,較區內政府車位月租只係1,800元貴超過一倍;東區鯉景灣近期亦都有車位業主叫租4,000元,同樣較區內政府車位貴超過一倍,所以唔少車主都選擇捱更抵夜輪候平一大截嘅政府車位。

專家倡電子化增效益

老友理想城市企業估值部主管張聖典認為,短期租約露天停車場對解決車位供不應求的情況,其實作用有限,因為呢啲供應會因應原址隨時發展而減少。

佢又話,隨着社會風氣改變,揸車嘅人多咗令到車位需求大咗,政府長遠要檢討停車場規劃政策,唔應該認為近公共交通嘅地區,車位需求就唔大,應該增加市區車位供應。

另外,高力國際亞洲估價及顧問執行董事張翹楚就建議,政府除咗可以增加供應,亦都可以推動停車場電子化,更有效率應用停車樓面,提供更多車位。

劉Sir