主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 3747
地產新聞
樓市出更:貨尾量積壓 新界西重災
(太陽) 2016年2月2日
呢幾年政府頻頻批地,市場新盤多咗,近排銷售氣氛又急速降溫,新盤貨尾開始積壓,特別係供應多嘅地區,劉Sir睇見代理一份報告,上季屯門、元朗呢兩區新盤貨尾加埋按季急增1,590伙,去到1,944伙,佔咗全港貨尾量7,509伙嘅26%,而全港新盤貨尾數目亦按季多咗333伙,創近八個季度新高。

劉Sir老友中原黃良昇話,舊年第四季選取咗全港193個新盤,總數有63,558伙,已登記賣咗56,035伙,扣重覆登記等,貨尾單位有約7,509伙,佔比重約11.8%,貨尾量按季增加約333伙,係近八個季度新高。

屯門元朗共涉1944伙

而貨尾都幾集中喺新界西北,屯門同埋元朗嘅貨尾分別按季多咗850及740伙,最新有857及1,087伙,係全港最多貨尾嘅地區,而兩區加埋約1,944伙貨尾,就佔全港約26%。

黃良昇就話,咁係反映咗區內新盤銷售唔理想,出現貨尾積壓,未來區內還有多個大型新盤推出,會構成頗大銷售壓力。以發展商做單位統計,佢話恒地(00012)新盤貨尾有1,542伙,新地(00016)及長實地產(01113)就分別有762及750伙。

娉廷開放示範單位

劉Sir知道嚟緊元朗都有新盤部署推出,長實地產封海倫話,元朗娉廷示範單位開放咗畀VIP參觀,有機會今個禮拜公布銷售安排,農曆新年後推出,暫時未決定推售單位數目。遠展(00035)方俊就話,元朗洪水橋洋房項目申請緊預售,預計六至七月推出。

此外,長實地產油塘東源街5及8號早排向城規會申請興建5座分層住宅,提供536個單位,呢個綜合發展區部分土地拆咗出嚟做住宅用途,所以規劃署唔反對。

至於英皇國際(00163)屯門新安街15號及同區建發里4號兩幢工廈項目,早前申請改裝做商場同商廈用途,規劃署亦都唔反對。

另外,規劃署修訂堅尼地城及摩星嶺大綱圖,修訂多幅土地用途,包括3幅土地做私宅用途,提供1,000伙,其中域多利道與加多近街交界用地將提供約63.7萬方呎樓面。中原又表示,一月份整體樓宇買賣登記3,122宗,涉額218.56億元,宗數創有紀錄以來25年歷史新低。

劉Sir