主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 3430
地產新聞
樓市出更:買家驚輸 筍貨照撻訂
(太陽) 2016年1月29日
二手市場日日都有劈價成交,樓市睇落「危危乎」,有剛入市買家寧願輸少當贏,上月買咗北角金堡大廈減價貨嘅買家,畀咗20萬元訂金以712萬元入市,由於驚樓價隨時再跌10至15%,即刻撻訂離場。另外,九龍三大藍籌竟同日齊齊有成交單位呎價跌穿1萬元,其中紅磡黃埔花園三房單位賣660萬元,比高位大跌逾30%。

世紀21日昇黃文龍同劉Sir傾開,話之前有個買家上個月以712萬元,買咗金堡大廈A座中層3室三房戶,單位實用面積約590方呎,個成交價已經較開價減咗38萬元,點知個客驚個市隨時再跌10至15%,寧願唔要20萬元訂金撻訂,實行輸少當贏,不過,個業主即時叫價738萬元再放盤。

利嘉閣陳維進稱,黃埔花園3期5座低層單位,實用面積679方呎,曾開價790萬元,個單位登記賣咗660萬元,實用呎價只係9,720元,個價較同類三房單位最癲成交價跌咗逾30%。而屋苑今個月到依家都只得1宗買賣,破晒新低。

麗港城三房低6%沽

市場又有人爆料,藍田麗港城26座高層三房單位,減價55萬元,只賣655萬元,實用呎價9,534元,低市價6%。美聯吳志輝話,荔枝角美孚新邨今個月都有14宗買賣,其中5期蘭秀道18號中層C室賣595萬元,實用呎價9,691元。

租客趁劈價買穗禾苑

居屋都要劈價,世紀21陽光陳世民話,火炭居屋穗禾苑E座極高層7室,兩房河景則王,唔夠兩個月就劈35萬元,有租客用355萬元買咗,實用呎價約7,505元,較高位跌價近15%。

世紀21聯誠謝寶昭指,藍田居屋康田苑B座中層兩房戶,舊租約月租要1.2萬元,叫價1.25萬元放租,個業主見租客可快起租,減到1.05萬元租出,實用呎租約26.3元,低市價約16%。

但減咗價之後細價樓交投回升,中原鄺家進稱,屯門大興花園今個月有12宗買賣,比上個月多2倍,屋苑10座中層三房戶,剛減42萬賣368萬元。祥益都有報告話屯門樓價返回17個月前價位。

劉Sir