主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 2771
地產新聞
樓市出更:2字頭上車代理都撲入
(太陽) 2016年1月15日
近幾個月樓價急步下跌,唔少未上車嘅市民都心郁郁留意有無筍盤。最近再有熟悉樓市行情嘅地產代理,把握上車機會,有大型代理行代理都執平貨,早前以唔使三球樓價,買入粉嶺碧湖花園兩房戶上車。其實依家區區有筍盤,沙田河畔花園中層戶樓價首度跌穿300萬元,減價17萬元,以298萬元賣咗,新界屋苑單位上車價終於重現「二字頭」。

劉Sir睇番土地註冊處資料,碧湖花園6座中層F室最近賣咗290萬元,登記買家係姚子峯。個價唔使三球當然筍,喺上年七月高位同類實用面積400方呎兩房戶要賣400萬元。

美聯指跟足程序披露

睇番買家個名同美聯新界北一個地產代理一樣,於是打電話問下美聯高層兼老友布少明,佢話,呢個單位係由公司一個後生嘅九十後同事買嚟上車,見個市回咗就決定入市,今次買賣有向原業主披露,喺合約上都寫明代理身份,同公司申報埋,跟足程序,其實一向都有代理買樓自用或者投資,但近排市差已經少咗。

劉Sir記得,早幾個月美聯就有3個地產代理夾份以260萬元超低價買入一個天水圍嘉湖山莊單位。

其實近排區區都有平盤。中原話,河畔花園B座中層4室開價315萬元,減到298萬元賣咗,大屋苑樓價都跌穿300萬元,實用呎價12,314元;另將軍澳新都城1期1座高層B室兩房戶四個月減80萬元,以460萬元賣出,實用呎價1.26萬元

星河成交價返兩年前

富誠地產講,鑽石山星河明居C座三房戶賣612.8萬元,返番去兩年前價位,實用呎價1.16萬元。

有代理話,青衣灝景灣2座中層E室劈70萬元,以680萬元賣出,比之前跌價16.6%,實用呎價1.03萬元。祥益話,佢哋行嘅屯門樓市呎價領先指數以實用面積計報331.19點,按周跌6.08%,返去15個月前價位。

租金都跌,美聯講,屯門瓏門1座高層H室以約1.78萬元租出,實用呎租約24.7元創屋苑新低,較高位回落約15%;將軍澳領都5座左翼極高層三房戶,成交月租僅1.38萬元。中原稱,鰂魚涌太古城鄱陽閣中層G室劈租8,500元後,以16,500元租出,實用呎租30.3元。

劉Sir