主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 2773
地產新聞
樓市出更:新界二手樓交投冧21%
(太陽) 2016年1月12日
近排二手買賣死晒火,特別係早兩年交投活躍嘅新界上車盤,一來一回下舊年買賣真係跌得幾痛。劉Sir睇見代理報告發現,舊年全年新界區二手買賣登記有16,231宗,比起前年勁跌21.9%最慘烈,但再仔細啲分,原來分區嚟計交投萎縮得最甘嘅分區唔係新界地區,而係黃大仙/鑽石山地區,舊年交投按年足足跌咗43.3%咁多,同時拖累呢區總成交金額跌34%,跌幅亦冠絕各區。

老友中原黃良昇同劉Sir講,舊年港島、九龍同埋新界三個主要地區嘅二手買賣登記按年全線下挫,因為下半年受到環球股市波動打擊,樓市焦點又去晒新盤,拖累全年二手登記數字下跌。

用家上車步伐放慢

佢話三個主要地區以新界區跌得最勁,舊年全年錄16,231宗二手登記,相比前年嘅20,780宗大減約21.9%,反映用家買樓上車嘅步伐減慢咗,九龍同埋港島區亦分別按年跌咗約莫11.4%同埋6%,錄12,248宗及7,861宗。

劉Sir發現,拆開24個分區,有19個嘅二手登記按年報跌,最意料唔到係跌幅最大分區唔屬新界,舊年以黃大仙/鑽石山嘅二手登記按年跌43.3%最多,亦拖累呢區總成交金額按年跌34%最傷,而買賣跌幅排第二都仲未到新界地區,香港仔/鴨脷洲二手登記按年減約29.6%,其後屯門錄約29.3%跌幅。

屯門地皮嗌9500萬

不過舊年新界7個分區二手交投就真係全線插水,除咗屯門跌最多外,荃灣二手登記都少咗約27.1%,好似北區、沙田、大埔同埋元朗/天水圍呢啲上車主要分區,都有超過一成跌幅。

另一方面,忠誠拍賣老友代理同劉Sir講,屯門青霞里6號一幅黐住官地嘅地皮會推出拍賣,呢幅地皮佔地約5,000方呎,開價9,500萬元,依家由一間老人院以3.78萬元承租。

依幅地皮位於青山灣花園後方位置,仲黐住政府今年第一季賣地計劃內嘅屯門市地段第516號地皮,估計部分發展商有興趣一併取得以上兩幅地。

劉Sir