主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 3169
地產新聞
樓市出更:馬頭角重建 收十標唔難
(太陽) 2016年1月11日
市區重建局馬頭角九龍城道重建項目將會喺聽日截標,呢個項目屬商住發展,但係約2.23萬方呎嘅商業樓面將來要交還畀市建局,劉Sir有測量師老友就覺得咁會對發展商出價構成影響。但佢同時又話,由於市區中型項目始終都頗有吸引力,相信一樣會有捧場客,最終標書數目多過10份都唔出奇。

劉Sir知道,九龍城道/上鄉道重建項目喺上年年底截收意向嗰陣,收到30份意向書咁多,最後有29家發展商獲邀入標,包括長實地產(01113)、新地(00016)同萬科置業(香港)等。

商業樓面交還礙出價

呢個重建項目提供約莫11.17萬方呎住宅樓面,涉及大概216伙,每伙實用面積唔可以少過260方呎,另項目嘅半數單位面積亦唔能夠多過480方呎。

老友理想城市張聖典就咁睇,由於商業部分要交還畀市建局,對發展商嚟講項目嘅可塑性會降低咗,所以喺出價上都會有啲影響,但呢個始終係市區中型項目,相信競投反應都會唔錯,有機會收到超過10份標書都唔奇。

至於高力國際張翹楚認為,市建局今次要求回收商業樓面嘅影響唔會好大,因為發展商喺計算地價時會扣除返有關部分,再者零售市道近排急速放緩緊,加上該區過往供應都比較少,認為競投反應唔會太差。

今次呢個項目,市建局沿用番以往嘅分紅模式,將來售樓收益達到19.2億元,用住宅樓面計算即係每方呎大約17,184元,中標財團就要向市建局作出分紅,當達標後首4,000萬元分紅比例係20%,之後兩個4,000萬元分紅30%同埋40%,當達標1.2億元以上,分紅比例為50%。

項目估值最高近13億

睇番資料,市場早排對項目估值約莫7.37億去到12.9億元。

另外,新一年度施政報告會喺星期三發表,政府早前已放風話唔會對樓市撤辣,兼且會維持穩定供應。張聖典認為,政府已表明對住屋供應嘅決心,但今個年度只有3幅商業同工業用地供應,認為除滿足住屋需要外,其實都唔應該忽視商業用地,有需要增加呢類供應以配合發展。

劉Sir