舖位投資學問高深，投資額往往多達數千萬元或更多。新成立的盛匯商舖基金管理，佢哋嘅行政總裁李根興尋日中午同劉Sir去咗佐敦道一帶，親自分析如何挑選具投資價值，以及回報穩定嘅舖位，仲教路有咩方法可以令舖位增值。
李根興同劉Sir講，通常位於街道中間位置嘅舖位，行人只有三至四秒決定會否進入舖內，但若果舖位位於街頭街尾，並鄰近等候過馬路位置，行人便有更多時間觀察店舖，增加進入舖內的機會，仲話「若舖位令行人等一等就會更值錢。」
盛匯全年冀籌10億
佢又話，通常舖位前方有欄杆保障行人安全，但就會影響人流，冇咁值錢，惟總可以合法拆走欄杆；佢舉例若果舖位由車房經營，由於要讓車輛進入舖內，就可向路政署申請拆走欄杆，若成功拆走，舖位對出道路人流會增加，價值隨之上升，而舖位未來日子亦更適合其他行業經營。
另外，他提醒要注意舖內外圖則有沒有沙井，若涉及污水渠，於夏季若遇上爆渠情況會散發大量臭味，不利食肆經營，故要留意舖外地下的渠蓋，但遇上雨水渠則冇問題；而經營中式食肆的舖位，就要注意有冇煤氣提供，同時若舖位外道路有足夠空間，就可申請露天食肆牌照，從而增值舖位。
佢仲透露，依家盛匯商舖基金已籌集6,000萬元，今年首季目標為3億元，全年目標為10億元。
工商舖交投睇升50%
美聯工商舖（00459）行政總裁黃漢成同劉Sir講，去年工商舖買賣註冊共錄7,515宗，涉及註冊金額逾941億元，分別按年升約12%及16%，其中舖位註冊量僅錄1,944宗註冊，按年跌約25%，創近十五年新低；金額亦按年減少約18%至約261億元，料今年市道明朗化，工商舖交投量料升五成，但核心區舖市售價料跌最多8%，租金跌最多兩成。
另億京新蒲崗大有街3號商廈項目尋日公布價單同拆售，包括地下7個舖位及樓上6層寫字樓逾60個單位，舖位售價4,525萬至2.2億元，呎價2.28萬至5.81萬元；寫字樓售價則由974萬至1.247億元。
劉Sir
App下載
