主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 3967
地產新聞
樓市出更:來季六地 估值220億
(太陽) 2015年12月28日
政府將喺日內公布明年一至三月(今個財政年度第四季)賣地計劃,雖然好多幅地皮因流標同司法覆核影響而打亂部署,但計番今個年度到依家已推嘅地皮,已經可興建逾1.5萬伙,加上賣地表仲有大把貨,下季單係政府地已經夠完成全年1.9萬伙供應目標,所以估計下季將約有6幅地應市,當中何文田同九龍筆架山豪宅地,以及大埔白石角同沙田等新界地皮都好有機會推出,估計可提供近3,700伙,總估值逾220億元。

今個年度賣地表內仲有多幅地皮待售,但由於距離年度供應達標只差約4,000伙,劉Sir估計政府嚟緊呢季會留力,只要滿足到全年供應目標就可以收手。

九龍兩豪宅靚地勢推

產業測量師張翹楚相信,全個年度供應達標問題唔大,若果從庫房收益角度嚟睇,市況回落或者會令政府盡快推啲豪宅地,如何文田同九龍筆架山兩幅豪宅地。

呢兩幅市區靚地已經通過規劃程序可隨時推出,其中何文田常盛街豪宅地規模比較大,可建樓面約58.77萬方呎,提供約910伙,市場估計每方呎樓面地價約1.25萬元,估值約73.5億元;至於佔地逾23.4萬方呎嘅龍翔道地皮,可以提供逾34.2萬方呎樓面,每方呎樓面地價料約2.1萬元,估值都有約71.9億元。單係呢兩幅地估值已經超過145億元。

睇番新界區,賣地表入面仲有兩幅大埔白石角地皮未推,相信嚟緊會先推一幅,估計會係創新路住宅地,總樓面約111.2萬方呎,約莫可以提供約1,220伙。另外,城規會月前通過改劃嘅沙田區3幅用地發展住宅,亦都有機會登場,合共可以提供約1,200伙。

計落呢6幅住宅官地,可提供近3,700伙,由於就算官地供應有延誤,仍然可依靠港鐵(00066)將軍澳日出康城餘下嘅期數填補,相信要做到全年1.9萬伙供應目標問題唔大。

康城九期料今收10標

講開鐵路項目,港鐵今季推出嘅日出康城第九期亦喺今日截標,市場估計收約10份標書,主要會係大型發展商。區內已有項目嘅新地(00016)之前已表態會競逐,其他近年喺區內奪地嘅發展商,好似長實地產(01113)、會德豐地產及南豐集團等相信都會入標。

劉Sir