主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 7235
地產新聞
2億放盤冇人吼 栢芝帳面蝕1,800萬
(東方) 2015年12月24日
美國加息,「息魔」終於殺到埋身,樓市勢必再往下行!圈中人向來喜歡投資磚頭,可是「摸頂」買入豪宅的藝人在樓市寒流下,隨時紮到變蟹。最新一《好報》披露張栢芝2011年以摸頂價1.28億港元購入中半山世紀大廈頂層特色戶,如今帳面蝕近2,000萬,走又走唔甩,勢成「蟹后」。而手持比華利山獨立屋的陳豪帳面亦蝕近1,000萬,計百分比,比栢芝更入肉。其他「摸頂」掃貨還有王祖藍、陳奕迅、佘詩曼等,手持豪宅升跌未卜,真係要自求多福。

「癲價」2億放盤冇人吼

樓評:摸頂入市,承受風險是常識,張栢芝2011年豪擲1.28億元購入中半山老牌豪宅世紀大廈2座頂層2,931呎、連2,000呎天台特色戶,創屋苑新高,至今仍未被打破。惟今年樓市下滑,世紀大廈分層戶樓價難免下跌,特色戶跌得更甘,如今栢芝的世紀大廈物業更跌至1.1億元,帳面蝕1,800萬元。

其實在去年樓市暢旺期間,栢芝以2億元「癲價」放售,可是乏人問津,如今樓市下行,業界人士指,莫說2億元,栢芝若要成功放售上述單位,平手走得甩已算是萬幸:「知道佢個盤仲暗放緊,依家一定去唔到2億,中半山呢個月成交都係得3單,上個月都係6、7單,真係幾淡。依家如果佢平手走都有機會放得甩,但係過億嘅豪宅真係要搵到有緣人,要撞囉!」

雖然帳面蝕約1,800萬元,但栢芝出名財力不俗,又唔等錢使,最緊要是其世紀大廈單位屬優質盤,即使暫時坐艇也不怕。

陳豪逾3千萬購愛巢 市值急挫兩成六

樓評:陳豪是圈中超級愛妻號,為打造五星級的家給太座陳茵媺,陳豪2013年一手樓銷售監管生效前,以3,368萬購入比華利山湖景道2,461呎雙號屋。如今樓市吹冷風,豪宅勁蝕個案升級,比華利山是其中一個重災區。其豪宅市值跌至2,500萬元,帳面蝕868萬元,以百分比計帳面蒸發26%,比栢芝蝕得更入肉。而老婆陳茵媺又將會生多個,一家五口靠晒陳豪,陳豪真係要更努力密密搵奶粉錢。

其實比華利山本月已出現勁蝕個案,該屋苑一幢「皇宮屋」別墅早前以7,500萬元沽出,比購入價1.05億元,勁蝕3,000萬元。對於陳豪變樓蟹,業界人士說:「陳豪購入嘅係呢個屋苑嘅優質單位,屬全海景,當時係示範單位連傢俬一齊買,抗跌力會比較強,但如果佢依家放都難免蝕住走,呢個屋苑之前蝕嘅都係景觀唔靚嘅單位,唔使1萬蚊就有交易,不過陳豪自住,當然唔使驚啦!」

舒淇揸5年「贏變輸」

樓評:相比陳豪蝕近千萬元,影后舒淇儘管帳面同是損手,但因為呎數較細,加上較早買,所以帳面只是蝕少少。舒淇2011年8月以1,830萬元購比華利山翠樺道1,606呎獨立屋,如今市值1,700萬元,帳面蝕130萬元,都算執番身彩。

業界人士指,比華利山共500多座,至少有4、5個景觀,不同景觀絕對影響樓價,而舒淇的物業屬該屋苑景觀座向不太理想地段:「嗰邊景觀真係麻麻,冇靚景,如果佢要走貨,1,700萬元都係頂晒龍。」

祖藍1.14億豪宅贈亞男 自住重私隱

樓評:要數今年買樓豪氣王,定必是王祖藍,今年9月他一擲1.14億元購入大埔逸瓏灣8座頂層2,809呎連平台天池屋,呎價達4萬元,創該屋苑最高「癲價」,據物業登記顯示,該物業只以其妻李亞男名字登記,等於大拿拿1.14億元贈愛妻,祖藍雖然豪氣,但面對樓市不明朗因素,難免震過貓王。據物業資料顯示,該類特色單位未有同類成交,因此難以計出該單位市值,業界人士亦指祖藍購入的單位差不多是摸頂買入,現時市值難以推算。

業界人士說:「佢個單位屬前排天池大屋,有Water Front,基本上係全個屋苑最靚View,但佢以呢個價買,都算係頂喇,雖然係優質戶,但如果要放盤,都幾難搵到人接,大埔買成億嘅樓,一定係有緣人啦!只要係自住,其實啲星都唔會好理樓價,佢哋反而更着重私隱度,好似祖藍嗰度咁,係大單邊望海,一定冇人睇到佢。」

「摸頂冒險王」3千萬圓House夢

樓評:佘詩曼向來對投資磚頭甚有心得,今年初更一圓House夢,以3,496萬元購入西貢南山雙連獨立屋。樓市近日下跌,據業界人士指西貢村屋也受牽連,阿佘幾乎是摸頂買入,要「走」也非易事:「要睇佢自住定投資,雖然佢買入個價唔平,但係勝在罕有,若要放唔會冇承接,但最多都係平手離場,依家個市嚟計,要推上個價就難喇!」

南區樓價波幅少 陳奕迅2.3億獨立屋「保值」

樓評:歌神陳奕迅(Eason)去年豪擲2.3億元購入南區Shouson Peak3,238呎獨立屋,呎價達7.1萬元,跟祖藍一樣,物業同樣只寫上老婆的名字,徐濠縈真係要多謝Eason。然而,Eason買入價是同類獨立屋的「癲」峰,加上沒有更新的買賣成交,所以市值難以估計。

業界人士指,南區的豪宅不太受樓市下行影響,沒買平也沒有買貴:「依家呢個屋苑都有人放盤,銀碼都係差唔多,呢個地段Main Villa值2億幾差唔多價,就算租都要30幾萬。」