主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 4645
地產新聞
樓市出更:工商舖乍現 一按借六成
(太陽) 2015年12月24日
近排頻頻有發展商推出高成數按揭搶客,呢個熱潮更加由住宅新盤蔓延到工商舖市場。有地產代理老友同劉Sir講,恒地(00012)啱啱出招促銷旗下市區10多個工商舖物業,呢批物業市值共逾4.2億元,配合買家財務需要,會引入最高售價六成一按揭,估計係市場上首個引入高成數按揭促銷非住宅物業嘅發展商,而且仲會向買家送首三年管理費優惠。

老友話,恒地最近除咗落力賣住宅新盤之外,仲加強促銷旗下市區合共約12個工商舖物業,針對銀行最高只可以提供售價四成貸款嘅限制,將會全面配合買家財務需要,最多可提供售價六成一按,大大減輕咗入市財務負擔。

荔枝角道舖嗌億六

據聞,恒地今次促銷嘅工商舖物業遍布港、九市區多處地點,部分連租約,每伙面積由341至3,589方呎,售價由741.8萬至1.62億元,當中以荔枝角道33號地下3至4號舖價最高,售價1.62億元,呎價約45,138元。

至於西半山輝煌臺地下6號舖,面積341方呎,售價2,402.8萬元,呎價70,463元。

除咗貴重商舖外,今次都有啲細價單位啱本較少嘅買家,好似長沙灣Global Gateway Tower的27樓2號單位,面積932方呎,售價859.7萬元。

而柴灣東貿廣場22樓D單位,面積1,425方呎,售價1,338萬元。據聞,代理佣金高達樓價1.5%。

囍滙逸瓏灣紛錄成交

對於恒地放售各區商舖,並提供六成一按,紀惠集團副主席廖偉麟話,暫時未知有關詳情,但相信購舖嘅都係有錢人,所以就算發展商提供高按揭成數都唔會產生不健康現象,自己個人就比較睇好寫字樓前景,因為依家空置率仲係低。

至於住宅新盤,信置(00083)營業部聯席董事田兆源話,節日氣氛未見影響新盤交投,灣仔囍滙第二期及大埔逸瓏灣II近日都錄到售價逾3,000萬元嘅高價單位成交,西貢逸瓏園的天池屋等特色戶亦錄不少查詢。另外,新世界(00017)元朗蔚林昨日賣出H6花園洋房,以1,919.8萬元售出。

劉Sir