主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 4457
地產新聞
樓市出更:車位罕有炒燶 年蝕14%
(太陽) 2015年12月23日
車位一向係市場奇葩,近年做價升勢仲跑贏大市,但係最近樓市逆轉,車位市場都驚現燶味。舊年年中由資深投資者拆售嘅新蒲崗康景樓停車場車位,曾經喺短短半年錄到超過百宗短炒成交,不過,近期罕見現損手,有買家去年接摸貨買入一個6樓雙號車位,揸咗逾一年以70萬元賣出,帳面蝕11萬元或約14%。

舊年年中拆售嘅新蒲崗康景樓停車場,由於大部分只售約六、七十萬元,所以約450個車位火速沽清,短短半年有超過100宗摸售個案,個別喺半年帳面已速賺36萬元或約53%,但最近終錄損手個案。

劉Sir睇番土地註冊處資料,項目有個6樓一個雙號車位,舊年年中拆售時以66萬元賣出,並火速喺唔夠一周以81萬元摸出,接貨嘅買家揸到今年十一月以70萬元賣出,比購入價低咗11萬元或約14%。

近月樓市回軟,部分屋苑已經出現車位蝕讓,好似將軍澳新都城2期B2層雙號車位,業主見近期車位買賣減慢,睇淡前景,所以想換貨,最終以約84萬元沽出,揸唔夠一年帳面蝕6萬元。另屯門美樂花園傳聞有投資者蝕讓沽咗部分車位,帳面損失兩萬幾。

車位註冊量增兩成半

近年車位有價有市,不少投資者趁勢拆售停車位,加上發展商賣新盤車位,令到呢類物業買賣登記數字穩步上升。據代理數據,今年截至本月中旬,純車位註冊量錄約10,356宗,比舊年全年約8,218宗,已經多出逾兩成半,數字連升兩年。

至於車位成交總值更加有約122.1億元,比舊年全年約88.9億元多出約37%。相信是由於今年嘅純車位買賣,大部分係100萬元或以上的個案,佔約5,094宗,佔整體比例近五成。

大角咀三工廈連環沽

工廈市場近排仍然有投資者入市。土地及公司註冊處資料,大角咀必發道130號、132號及134號三幢相連工廈,分別以4,970萬、3,770萬及3,770萬元賣出。

據了解,上述三幢工廈嘅買家,都係運得利投資有限公司,該公司董事包括陳偉倫及葉振國。而陳氏同宏基資本(02288)主席兼行政總裁同名。

劉Sir