劏房租金係咁加 無殼蝸牛更徬徨

新聞資訊 > 地產新聞 返回
瀏覽人次 : 4337
地產新聞
劏房租金係咁加 無殼蝸牛更徬徨
(東方) 2015年12月22日
好多人以為港府管治班子拉雜成軍,質素低下,咁諗就大錯特錯喇,查實港產官僚臥虎藏龍,能人輩出,好似發展局局長陳茂波咁吖,獨具慧眼,一早識得重錘出擊投資劏房,投資觸覺直頭拍得住股神巴菲特呀!

唔係吹水(口架)!有大學聯同關注團體進行調查,根據差餉物業估價署四十平方米以下細單位嘅租金指數,再比較百多個同類型單位嘅劏房租金,以實際租金、電費等進行評估,制訂全港首套劏房租金指數,結果發現過去四年劏房租金上升速度達五成六,而同類細單位升幅只有兩成一,葵涌區一個一百呎劏房單位,月租竟然高達九千元,呎價仲超勁過豪宅,「波叔」咁有先見之明,抵佢發達嘅!

當然喇,有錢投資劏房就話豬籠入水啫,可憐住喺裏面嘅基層市民,以豪宅級呎租住豆腐膶單位已經夠無奈,環境同設備仲要差到無人有,嗰種辛酸實在不足為外人道。大家有眼見,今日香港劏房遍地開花,無奇不有,豬欄、雞欄改建有之,一個單位劏成四份,一個窗口安裝四部冷氣機有之。至於籠屋更加係等而下之,有啲居然夠膽死喺廁所上面間床位,人哋「前舖後居」,佢就「上居下廁」,問你服未。

不過你咪理,劏房籠屋再逼仄,環境再惡劣,咪一樣有價有市。又難怪嘅,租得起私樓,輪得到公屋,邊個會自己攞苦嚟辛住劏房籠屋吖?公屋輪候時間愈來愈長,所謂三年上樓嘅承諾,早就證明係空頭支票,其中劏房戶更加係重災區,前排有調查發現,七成受訪工廈劏房戶同時輪候公屋,當中超過三成已輪候三年以上,一成人甚至超過五年添。

咁都未算吖,港府之前公布十年建屋大計,聲稱要興建二十九萬公營房屋,係威係勢咁,點知轉頭就靜靜雞調低指標,劏房戶要輪候公屋喎,冇八年抗戰嘅決心都唔掂吖。

話時話,劏房同籠屋問題已經講咗N年,連外國傳媒都報道過,搞到香港臭名遠揚,點解情況不但冇改善,仲不斷惡化?鬼咩,官僚闊佬懶理,漫不經心,蚊都瞓蛇都死喇。有人建議港府利用閒置校舍、政府宿舍等,為有需要人士提供過渡性房屋,問題係港府一邊呻無地起樓,一邊由得官地養蚊,申訴專員都唔知炳過幾多次,即使有再多土地,無殼蝸牛都係得個睇字嘅咋。

都係北大人講得啱,房屋問題處理不當,分分鐘由民生問題演化為政治問題。今日香港已經七國咁亂,港府施政已經夠晒甩轆,如果再搞到千千萬萬劏房戶揭竿而起,你話到時點收科!