主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 5654
地產新聞
樓市出更:投資者轉戰半契地廠
(東方) 2015年12月1日
住宅樓市轉角向下,城中投資另類住宅嘅投資者伍冠流,亦轉投非核心商業區九龍灣嘅地廠。佢尋日同劉Sir講,新近以約760萬買咗宏冠道鴻力工業大廈A座一個半契地廠,較市場估值低咗約莫45%。佢仲話地廠係商業性質,冇咁複雜,風險比較低,估計應該都唔會同另一半物業持有人再有業權爭執。

伍氏同劉Sir講,上述鴻力工業大廈A座地廠半契物業,成交價約760萬元,只係半份業權市價嘅再55折,佢好滿意成交價,又話過去都試過投資舖位,今次就未知點用物業,可能會同另一半業權持有人傾下會唔會購入或出售各自持有嘅半份業權,又或共同出售或出租,不過都要傾過先有決定。

維景銀主盤嗌平16%

佢仲話,地廠係商業性質,風險應該較半契住宅為低,估計唔會再出現與另一半業權人爭執嘅局面,仲講可以考慮下各用一半。聽講個地廠面積約1,578方呎,物業整份業權市值約2,683萬元。

另外,近月市場上陸續新增咗更多銀主盤,環亞拍賣老友代理同劉Sir講,今個月新咗兩項銀主物業,包括將軍澳維景灣畔7座中層A室,實用面積約639方呎,開價700萬元,較網上銀行估值低16%,實用呎價約10,955元。

睇番土地註冊處資料,該盤曾先後多次向銀行及財務公司承造按揭。其實該屋苑今年都甚少出現銀主盤,記得該屋苑上一個高層銀主盤成交已經在今年一月,以約640萬元拍出。另一項為何文田愛華大廈高層D室,實用面積約1,109方呎,開價1,080萬元,較市價低約三成,呎價約9,738元。

翠屏低市價10%拍出

該行昨日拍賣會成功拍出3項物業,包括元朗十八鄉山貝雙號銀主石屋,面積不詳,開價150萬元,以161萬元拍出;另由遺產承辦人推出拍賣的大埔翠屏花園B座低層單位,實用面積約262方呎,開價238萬元,以268萬元拍出,低市價一成;另同區居屋明雅苑明凱閣A座高層單位法院無契樓,實用面積363方呎,開價250萬元,以280萬元拍出,較市價低兩成。

劉Sir