主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 6117
地產新聞
樓市出更:地皮接踵推 反應料兩極
(太陽) 2015年11月23日
今個禮拜港鐵(00066)同政府都有大型住宅發展項目推出市場,今日就有將軍澳日出康城第九期截收意向書,星期五就有大埔山塘路截標,兩個地盤分別都估計可以起到接近1,800伙,一個禮拜內推地涉及近3,600伙。測量師估計兩項目市場反應一冷一熱,其中康城項目料可接逾20份意向書,惟山塘路地皮就受青衣地流標等事件拖累,估計只會收到4至5份標書。

康城9期建1780伙

今星期兩個項目當中,今日截收意向嘅將軍澳日出康城第九期,係項目今季唯一推出港鐵項目,可建總樓面逾112.9萬方呎,最多可以起1,780伙住宅,分布喺三幢住宅大樓,項目需要起一間幼稚園,估計二○二二年落成。

市場暫估計項目每方呎補價約2,600至2,830元,貼近之前長實地產(01113)投到嘅第八期,涉及金額29.4億至32億元。

至於同樣都估計起1,780伙嘅大埔荔枝山山塘路地皮,就係季內最大規模的出售官地,最高可建樓面逾115.28萬方呎,市場估計地皮可以做分層及洋房混合發展,估值46.1億至66.9億元,每方呎樓面地價大約4,000至5,800元。

不過法庭早前已經批出司法覆核許可,令發展商就算買到塊地皮,係咪可以成功起樓發展增添變數。
統計今個星期推出嘅兩幅大面積地皮,估計合共可以提供約3,560伙住宅供應,佔今季供應約4,840伙的73%,可謂今季舉足輕重的土地供應。

山塘路料僅5標書

劉sir老友,產業測量師張翹楚認為,日出康城第9期鄰近未來興建的商場,部分單位可享海景,雖然離港鐵站遠咗少少,但係都預料可接到超過20份意向書,去到招標階段仍可以收到大約10份標書。

至於大埔山塘路地皮,張翹楚認為市場喺經歷早前青衣地皮流標事件後,法庭批出司法覆核又增發展風險,加上經濟前景未明,發展商對於位置較偏僻地皮取態會較保守,估計可能只係收4至5份標書。

劉Sir