樓市出更:舖市冷風吹入二線街

新聞資訊 > 地產新聞 返回
瀏覽人次 : 6041
地產新聞
樓市出更:舖市冷風吹入二線街
(太陽) 2015年11月20日
核心區主要街道舖租跌勢急,其他二線街道舖位亦都「跟住一齊跌」。有代理同劉Sir講,近排佐敦的佐敦道一個原由鞋店承租嘅雙號地下舖位,最近獲電訊公司以13.5萬元承租,較舊租金跌咗25%,另外,深水埗北河街一個幾個月前以近1,600萬元賣出嘅舖位,最近被買家撻訂。

有老友代理同劉Sir講,佐敦道一個原由鞋店承租嘅雙號地下舖位,面積約700方呎,近日以約13.5萬元租畀電訊公司,較舊租金跌25%。

聽講其他毗鄰同類型舖位嘅租金都至少20萬元,咁計法,新租金低市價超過三成;另外同區彌敦道雙號地下舖位連閣樓,面積共約2,500方呎,近日就獲保健產品店以約35萬元承租,較舊租金亦都跌咗8%。

另劉Sir又聽講,深水埗北河街一個喺數月前以近1,600萬元賣出嘅舖位,最近被買家撻訂,而家該舖位業主重新以約莫1,600萬元放盤。

奧海城千萬谷旺聖誕

街舖租跌,大型商場亦變審慎,信置(00083)租務部總經理陳欽玲話,奧運站奧海城今年聖誕斥資1,000萬元作推廣,料十一月及十二月聖誕檔期營業額達4.7億元,按年升8%,人流料有10%升幅,創歷年新高,但係呢個預測升幅數字就較往年保守,主要因為往年基數較大;而全年計,奧海城料錄得25億元營業額,按年增長6%。

佢仲話,今年商場已完成優化工程,三個原由銀行、大型連鎖時裝店及售樓處使用嘅舖位,分拆做30間舖位,提供9萬方呎樓面;而商場今年有30萬方呎樓面續租或新租,部分舖位租金有雙位數升幅,商場呎租介乎50至200元,下年就有26萬方呎樓面租約期滿。

龍豐一籃子車位封盤

皇家特許測量師學會就話,第三季嘅RICS商業地產租戶市場情緒指數由上季-3下挫至-22,反映零售房地產前景不樂觀。

美聯商業李鎮麟話,佐敦幸福商業大廈高層全層以約370萬元沽出,呎價僅約4,683元,創下該廈一年呎價新低。

另市傳屯門彩華花園地庫共36個車位以獲買家以約1,800萬元洽購;而由投資者蔡伯能持有,預計今個禮拜拆售嘅上水龍豐花園一籃子車位暫時封盤。