主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 5471
地產新聞
樓市出更:港舖租低過紐約46%
(太陽) 2015年11月19日
本港零售業正值寒冬,核心區舖位租金跌足成年。劉Sir尋日睇咗戴德梁行發表最新嘅《全球主要大街》報告,曾經風光一時、上年失守全球商舖呎租最貴寶座嘅銅鑼灣,每方呎租金約1,559元,按年再跌約12%,連續兩年屈居第二位,較首位嘅美國紐約第五大道上段低達46%。

劉Sir收到一份《全球主要大街》報告,個報告追蹤咗全球超過500條主要商業街道,並按該行數據所計算的頂級商舖租金為街道排名。

截至今年第二季度,連續兩年屈居第二位的銅鑼灣,每方呎租金約1,559元,按年再跌約12%,更較一三年的約1,961元低咗兩成,而紐約的第五大道上段就蟬聯咗全球最昂貴舖租商業街道,舖租達到每方呎2,275元,按年上升3.6%。

不過報告仲話,銅鑼灣今年就繼續成為亞太區最昂貴舖租嘅商業地段,不過受到銷售下跌及旅客人數減少影響,區內主要街道舖租都面對下調壓力。

羅素街地舖冧租六成

事實上,劉Sir發現銅鑼灣減租幅度嚴重,好似早前區內羅素街一個原由國際名錶店承租嘅雙號地舖,九月獲本地化妝品店以70萬元承租,較舊租金暴跌六成。

該行亞太區商業地產租戶代表主管寧孝言就話,亞洲整體商業市場嘅前景較為正面,預料未來五年間以美元計算的銷售增長平均可望達到8.5%。

商舖基金擬10億掃貨

另外,盛滙商舖基金管理行政總裁李根興同劉Sir講,今年四大核心區舖租普遍已跌三成,料明年會再跌最多15%,而舖價料跌20%,佢表明若果喺核心區成功鋤價逾三成,就會以現金買舖。

佢又話,睇好港島西、灣仔、九龍城、荃灣及佐敦等非核心區,料該區舖位租售價長遠平穩發展。

佢仲話,早前有人士非法集資買舖位,反映好多買家都想進駐舖市但欠缺資金,而佢喺兩星期前成立全港首間持有香港證監會牌照的商舖投資基金公司,目標集資10億元,會以合法途徑邀請持有至少800萬元流動資產嘅合資格投資者參與。

劉Sir