主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 5046
地產新聞
校舍空置養蚊 寸土必爭搵笨
(東方) 2015年11月19日
房屋問題死結難解,港府束手無策,一味好似盲頭烏蠅咁四圍盲搶地,甚至一度想打郊野公園主意添。其實,香港邊係冇地吖,只係官僚暴殄天物,有地而唔識利用啫。

嗱,審計署發表新一份衡工量值報告,踢爆十多個部門行政失當,問題多多。其中檢視空置校舍問題時,揭發由○五年至一五年四月期間,共有二百三十四間校舍空置,當中四成半即一百零五間未有使用,七十三間被教育局認為不適合作教育用途而交回地政總署,呢啲校舍已分別停用零點六年至三十五點六年不等。審計報告又揭發,有七十九間空置校舍被納入學校改善工程計劃,其中二十六間喺改善工程完成後五年內仍然空置;而喺一百零五間未有使用嘅校舍中,當局保留二十九間作為教育用途,但奇怪嘅係有啲學校已停辦近十六年,都唔知保留嚟做乜。

香港寸金尺土,港府任由大量校舍荒廢,何止係暴殄天物,直頭係浪費資源。特別係嗰七十幾間交回地政總署嘅空置校舍,點解唔用嚟改建房屋呢?官僚經常問地從何來,其實遠在天邊,近在眼前,大批校舍長期丟空,有啲甚至長達三十五年,港府渾渾噩噩,一味嘆無地建屋,等於守住金庫呻窮,你話係咪匪夷所思吖。

其實,隨着適齡學童持續下降,校舍空置情況愈嚟愈普遍,如果將部分改為房屋用途,紓緩居住問題,保證市民舉腳贊成。道理好簡單,空置校舍與其荒廢養蚊,何不為無殼蝸牛着想呢?

除咗丟空校舍問題,教育局亦被踢爆浪費公帑,明知部分小學收生不足,仲將校舍納入改善工程計劃,結果有啲小學呢頭做完改善工程,嗰頭殺校停辦。最典型嘅例子係,有間被殺嘅小學白白浪費三千幾萬元工程費,豈有此理!

話時話,港府浪費珍貴土地資源,又點止空置校舍吖。空置街市、私人會所、公務員宿舍、遭非法霸佔嘅官地……只要港府善加利用,就可以大大紓緩土地荒問題,又使乜搞到盲搶地咁狼狽吖。當局一方面任由大量土地閒置,一方面打郊野公園主意,係人都唔服喇。計功夫茶話齋,港府不如認真諗吓點樣撥亂反正,善用閒置土地同收番部分私人會所用地,咁仲實際喇!

所以話,房屋問題搞到積重難返,政客為反對而反對,一味阻住地球轉,固然抵鬧,而官僚尸位素餐,得過且過,一樣難辭其咎。嗱,反正有咁多校舍丟空,不如搵一間改建成高官幼兒班,畀港產官僚接受再教育吖!