主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 5404
地產新聞
樓市出更:馬頭角項目估近13億
(太陽) 2015年11月16日
市區重建局今季推出兩個重建項目,其中規模相對大一些嘅馬頭角九龍城道重建項目會喺聽日截收發展意向書。呢個項目預計提供約莫216個單位,已經係近一年以嚟伙數最多嘅市建局項目。而項目有未來沙中線嘅優勢,有測量師老友估計項目可以收到20幾至30份意向書,而項目嘅估值分歧頗大,介乎約7.37億去到12.9億元不等。

政府早排公布咗會喺本季推出兩個市建局項目,劉Sir知道,聽日截收發展意向嘅九龍城道/上鄉道重建項目,地盤面積大約1.49萬方呎,住宅樓面就約莫11.17萬方呎,將會提供大概216個住宅單位,另會有大約2.23萬方呎商業樓面。

至於另一個深水埗海壇街「蚊型」需求主導項目就經已喺較早時間推出,並將於下月八日截標。呢個項目喺海壇街205至211A號,佔地只係4,553方呎,預計可建總樓面約40,946方呎,只係提供69伙,今年十月嗰陣收到22份意向書。

提供216伙 反應料熱烈

劉Sir知道,市建局喺過去一年合共推出咗5個住宅重建項目,但多數係提供幾十至百多伙嘅蚊型發展,所以九龍城道項目提供216伙,已經係過去一年規模最大嘅市建局項目。

市場就覺得呢個項目聽日截收意向書會有唔錯嘅反應,老友理想城市張聖典就話,項目將來擁有鐵路沿線優勢,加上呢區具有重建概念,都幾有發展潛力,對發展商嚟講都有一定吸引力。

佢估計可以收到20幾至30份意向書,預計每方呎樓面地價大約5,500元,計番成個項目估值大約7.37億元,而市場嘅最高估值約為12.9億元,計番每方呎樓面地價大約9,621元。

同區多舊樓 二手市呆

呢個地盤鄰近一帶物業以舊樓為主,而主要屋苑就只係得土瓜灣翔龍灣及傲雲峰,受到鄰區新盤銷售影響,最近二手買賣表現比較呆滯。

老友中原葉文浩話,翔龍灣同埋傲雲峰今個月合共有約5宗成交,翔龍灣佔咗4宗,最近叫價回軟,屋苑平均實用呎價約1.3萬元,比起之前跌咗約1,000元。

劉Sir