主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 6300
地產新聞
樓市出更:私宅落成量僅達標60%
(太陽) 2015年11月9日
政府積極增加私樓供應,不過到現時為止,整體私樓落成量較預期仍遠遠落後,僅達標約60%,暫時只有大埔、離島同灣仔區落成進度較理想,其中大埔區落成量1,370伙,已經全數達標,其餘兩區落成單位分別超過1,400伙,亦達標超過80%。不過,九龍城區落成量僅約418伙,僅達標近17%。

劉Sir翻查屋宇署分區私樓落成量資料,截至九月份大埔區落成量已經達標,有1,370伙落成,主要落成項目係信置(00083)嘅逸瓏灣I及逸瓏灣II。至於亦近達標嘅離島同灣仔區,落成單位分別有1,448伙及1,401伙,較政府預期嘅1,669及1,662伙,達標86.8%及84.3%。

其中離島區有南豐嘅東涌昇薈喺九月份取得入伙紙,落成單位1,419伙;而灣仔區則受信置等嘅市區重建項目囍匯2期共約1,096伙於年初落成入伙帶動。

至於係本港住宅供應重鎮的元朗區,至今落成量1,029伙,較全年預計落成量1,492伙,暫達標約69%。
沙田涉不足千伙跑輸

不過,政府原估計九龍城區全年私樓落成量有2,481伙,係全港落成量最多地區,但到九月已落成項目僅有418伙,佔全年估算僅約16.9%。

而政府估算落成量約2,086伙嘅沙田區,係全港第二高落成量地區,但落成量暫只有993伙,佔預測數字約47.6%。

按差餉物業估價署資料,今年首九個月已落成私樓項目有7,932伙,僅係全年預測約59.7%;其中新界區表現最理想,已落成項目涉4,840伙,佔該區全年預測近72.9%,而港島及九龍區落成量暫達標約67.5%及28.4%。

舊契地盤 免限期完工

劉sir老友產業測量師張翹楚話,九龍城區落成量大幅落後,相信主要原因係區內比較多舊契地盤,發展商唔使好似官地咁,要特定限期內完工,估計發展商亦都希望「食正」沙中線優勢而調整發展步伐,所以預計該區落成日期變數亦都唔少。至於新界區係本港新盤主要供應來源,但係因為大型項目比市區多,所以落成量嘅變數都會相對大。

劉Sir