政府上季賣地計劃最後一幅地皮將會喺今個禮拜五截標，呢幅青衣細山路住宅地，係政府歷年賣地以來首幅推出嘅青衣私人住宅地皮。測量師老友就覺得地皮最大風險係毗鄰廣達6.1公頃嘅斜坡，會增加發展商嘅不確定成本，市場估值最高約莫28.45億元。
劉Sir知道，呢幅青衣細山路住宅地，位於青衣美景花園旁邊，佔地大約6.67萬方呎，以最大商業樓面20.02萬方呎計算，連同住宅部分，成個項目總樓面就約莫47.42萬方呎。
周五截標 主打中小戶
呢幅禮拜五截標嘅地皮，由於項目涉及龐大斜坡，所以最快要大約二○二三年十二月底前才能落成，建築期長達八年，預計提供約740個住宅單位。
老友理想城市張聖典就咁睇，佢話發展商要負責項目附近斜坡嘅維修同埋保養工作，並要為後方大約6.1公頃嘅山坡進行岩土勘察等工作，咁樣會增加咗項目嘅不確定成本，所以佢估計每方呎樓面地價約莫4,000元，計番估值大約18.97億元左右，係市場下限價。
中原測量師行張競達就睇得比較好，佢相信呢幅地皮會主打發展中小型單位，商舖部分就估計以民生行業為主，而地皮規模適中，預計入標反應會唔錯，估計每方呎樓面地價大約6,000元，折合估值約28.45億元，係市場嘅最高估值。
劉Sir知道，呢幅細山路地皮係政府歷來首幅推出嘅青衣私宅土地供應，而近年批出嘅兩幅同區地皮都係物流用地，對上一幅係一三年五月以逾16.9億元批出嘅青鴻路與青衣路交界物流地，計番每方呎樓面地價大約1,850元。
二手市呆 美景未開齋
至於青衣市況方面，最近二手表現呆滯，就好似位於即將截標地皮毗鄰嘅美景花園，今個月截至二十二日，交投都仲未破冰。
美聯樊志聰同劉Sir講，美景花園位置上比較唔方便，前往港鐵青衣站需要約十分鐘車程，向來交投都比較稀疏，屋苑今個月都仲未錄得成交，依家有約20幾個買賣放盤，入場費大約370萬元。
劉Sir
App下載
