新聞資訊 > 地產新聞 返回
瀏覽人次 : 7669
地產新聞
樓市出更:富榮狠劈 年內最平居屋
(太陽) 2015年10月16日
二手樓市近排雖然有唔少業主肯減價,但始終願意狠劈比例唔算多,所以交投氣氛仲係相當靜,好似十大屋苑十月上半月只係得約莫30宗買賣,按月減逾43%,其中荔枝角美孚新邨仲未破蛋。其實只要肯再平,一定有買家,好似旺角居屋富榮花園早前無人吼嘅減價盤,再減30萬元終於賣出,實用呎價7,231元,創今年居二市場新低。

劉Sir睇番今個月二手表現,十大屋苑上半月加埋只得30宗買賣,比九月上半月低位53宗,再減少43%,美孚新邨竟然無成交,其餘九個屋苑都只得個位數交投,就算鰂魚涌太古城得1宗,唔少業主肯減價嘅沙田第一城,都只係得4宗。

中原賴敏菁話,東涌區今個月得7宗二手買賣,指標屋苑映灣園都只有2宗,屋苑3座中層三房戶減20萬元,以780萬元賣出,實用呎價跌到得番8,159元。利嘉閣劉浩勤話,將軍澳區有30宗二手買賣,由於業主肯減價,所以成交比月初多番啲。美聯徐浩煇話,區內旭輝臺2座低層E室減價10%,以503.8萬元賣出。
賣350萬 每呎7231元

目前市場上只有好少業主減價,加上減得唔勁,所以交投咁少,好似富榮花園12座極低層F室,實用面積484方呎,之前第二市場已減60萬元,以380萬元放盤,但都賣唔出。

家天下黎振傑講,個單位最後減多30萬元,終於以350萬元賣咗,實用呎價7,231元,低市價約13%,係今年新低。

其實依家業主只要減到今年最低價,二手就有承接力。富誠地產潘祖兒話,牛池灣曉暉花園5座高層C室劈咗70萬元,以568萬元賣出,實用呎價11,429元,重返去年初水平。

卓爾居485萬半年低

中原鄺家進講,屯門卓爾居5座高層G室賣485萬元,係半年新低,實用呎價9,256元。

該行伍遠帆話,同區新屯門中心1座中層G室,減價之餘,業主再送全屋新裝修,最終賣咗392萬元。

祥益屯門樓市呎價領先指數,實用面積計報356.83點,按周跌6.13%,返到上年底水平,屯門時代廣場B座高層7室,七月起減足115萬元,最近賣咗405萬元。

劉Sir