主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 7210
地產新聞
樓市出更:一線街舖冧租17年最傷
(太陽) 2015年10月14日
核心區舖租跌勢持續,有代理行同劉Sir講,第三季四大核心區舖租按季跌咗9.1%,創咗十七年以來最大季度跌幅,其中銅鑼灣跌租幅度最大,按季跌11%,今年至今更跌22%,該行仲預計未來會出現更多高價零售商退租個案。不過,非核心區舖市走勢就做好,元朗青山公路有本地連鎖化妝品店擴充,以約35萬元承租全幢舖位,並連同毗鄰自用舖合併成6,000方呎巨舖,迎接聖誕節消費檔期。

世邦魏理仕商舖服務部執行董事連志豪同劉Sir講,第三季四大核心區嘅整體舖位租金按季跌9.1%,係自九八年以嚟最大嘅季度跌幅。

佢話當中以銅鑼灣租金跌幅最大,按季下跌11%,由年初起計,累積跌咗22%,而中環區按季則跌9.2%,而尖沙咀及旺角就分別按季跌7%同7.6%。

佢又話,第三季更錄得多個奢侈品牌同高價零售商喺一線街嘅舖位退租個案,而中檔零售商正積極把握機會重新喺核心地段立足,其中以化妝品零售商、運動服裝品牌同健身中心嘅表現最活躍。

核心區全年恐冧租25%

連志豪預計,第四季核心零售商舖平均租金會繼續下跌,全年租金下調20至25%,而未來數季會出現更多奢侈品零售商退租或整合嘅情況,非奢侈品商戶會成為未來舖市主要動力。

反而非核心舖位市況唔錯,有商戶趕喺聖誕節前擴充,消息稱,本地連鎖化妝品店以約35萬元承租咗元朗青山公路單號全幢物業,面積近3,000方呎,聽講該化妝品店原本已經持有毗連一幢全幢物業作自用舖,而目前正裝修緊呢兩個全幢舖位,準備迎接聖誕檔期。

另同區教育路單號地舖,面積約2,500方呎,獲台灣麵店以25萬元續租,租金較舊租升咗四成。而上水新豐路單號地舖就獲銀行以19萬元續租,租金升咗26%。

阿信屋難捱 放慢開店

不過,CEC國際(00759)主席林偉駿就同劉Sir講,近期759阿信屋生意比較難做,但不會將其視為「寒冬」,只係業務要因應本地市場的變化而調整,因為現今嘅消費者變得較審慎及理性。

佢話,除美孚新邨舖位減租5,000元之外,其餘四十間洽談續租的759阿信屋店舖都無減租,未來開店步伐會減慢,過去數月已關閉4至5間規模較細嘅舖。

劉Sir