主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 7346
地產新聞
樓市出更:山頂南區 大刁縮7成
(太陽) 2015年10月2日
第三季樓市受到股市同息口問題困擾,買賣氣氛麻麻,連一向唔憂賣嘅山頂、南區豪宅都無咁旺。睇番呢兩區上季表現,雖然全季成交量只跌咗約5%,有約53宗,但由於億元成交只得約5宗,按季急跌咗72%,搞到第三季成交總值得番約41.79億元,比第二季嘅50.6億元跌約17%。

美聯方富義同劉Sir講,第三季由於華懋等推售拆售大潭紅山半島洋房,單係呢個盤就佔咗約28宗成交,令到上季山頂、南區交投量都冇咁失色,有約53宗,比起第二季只係少咗3宗或約5%。

全季億元買賣僅五宗

不過,由於第二季各發展商積極推洋房新盤,期內賣出11幢一手洋房,包括50 Stanley Village Road佔8宗、南埼1宗、環角徑2號2宗,間間售價超過1億元,而第三季喺洋房新盤推售唔多嘅情況下,全季只得5宗逾億元二手成交撐住,所以比起第二季嘅18宗,就跌咗約72%。

租賃近百宗 實呎56元

講番上一季最矚目成交就係山頂白加道一幢洋房以約15億元賣出,平均呎價約15.2萬元,另外,深水灣道39號有幢雙號屋以3.52億元賣出,實用呎價約9萬元亦係創咗項目新高。

至於指標二手屋苑,第三季成交量大部分係個位數,比較好嘅大潭陽明山莊都只係得6宗,浪琴園更加得1宗。

租務方面,呢兩區第三季約有93宗租賃成交,平均實用呎租56元,當中洋房有18宗。而全季月租逾10萬元的大額租務佔37宗,呎租同月租最高係南灣道16A號一幢單號屋,月租35萬元,以實用面積3,657方呎計,實用呎租高約96元。

何文田九龍塘近冰封

其實,上個月好多豪宅區都出現交投冰封情況,好似何文田及九龍塘傳統豪宅區約莫有30多宗二手成交,唔單止比八月跌咗約37%,相比今年最旺嘅六月約莫有87宗,更大跌64%。

早幾日九龍延坪道地皮以每方呎樓面地價約1.11萬元成交,平過屯門地,不過代理老友就話,區內業主好冷靜,無咩即時主動割價,事關唔少之前已經減咗價,但都仲未有成交,所以寧願等有實在買家出價,先睇吓要減幾多。

市場呢幾日成交零星,部分做價差過七年前。利嘉閣李德臻稱,東半山年達園一個實用面積約973方呎單位,獲買家以約2,020萬元買入,實用呎價約2.1萬元。

劉Sir