主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 5801
地產新聞
樓市出更:樓上舖搶手 租金逆漲5成
(太陽) 2015年9月23日
核心區街舖租金近月一直滑落,但係樓上舖租金走勢就逆市升。劉Sir打探到銅鑼灣怡和街一個一樓舖位,早排原由茶餐廳以每月約13萬元承租,但早前換咗租客,租金反而升到去約莫20萬元,升幅超過五成。代理老友話,近年地舖租金搶到超貴,但樓上舖升幅無咁癲,所以喺依家市況都仲有得升。

不過,同區街舖就繼續「唔掂」,駱克道一個地舖以近40萬元租出,較叫租低兩成。

有代理老友同劉Sir講,怡和街雙號一樓一個舖位,面積約莫2,100方呎,早前就獲新租戶以約20萬元承租,呎租約95元,較本地茶餐廳舊租戶的月租約13萬元高出逾五成,反映核心區樓上舖市道同街舖走勢各異。

另外,有承租同區駱克道雙號1樓樓上舖嘅書店,喺社交網站中話,租金昂貴以及實體書生意一落千丈下,要維持下去,簡直難如登天。

事實上,貴為區內人流最旺嘅怡和街,劉Sir睇番呢條街近幾年嘅地舖,建築呎租最高見過3,000多元,但同一條街一樓舖就差天共地,呎租低過100元都仲有不少選擇,所以樓上舖租金反而有一定上升潛力。

駱克道地舖低20%租出

而同區街舖租金走勢就繼續向下滑,消息稱,區內駱克道單號地舖,面積約900方呎,最近獲新租客以接近40萬元承租,較之前叫租約50萬元低兩成;而鄰近海旁的尖沙咀麼地道雙號地舖連一樓,面積逾3,000方呎,聽講最近就有英國知名食肆成功承租,平均呎租估計高達200元或以上。

仲量聯行馮嶽宗話,堅尼地城吉席街高逸華軒地下B號舖,實用面積約2,995方呎,以公開招標形式出售,市場估值逾1億元,截標日期為十一月十一日。

新東海標售意向億三

寫字樓方面,中原寫字樓部唐苑雯話,尖沙咀新東海商業中心5樓08室,面積約10,973方呎,分為兩個單位,以交吉及連約形式標售,意向價約1.37億元,截標日期為十一月三十日。

高力國際盧永輝話,受惠內地「走出去」政策及最新合資格境內機構投資者計劃,假設未來五年有15家中型銀行設立辦事處,將使中環出現45萬方呎商廈需求。

劉Sir