主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 6719
地產新聞
樓市出更:業主啃稅出貨 驟增55%
(太陽) 2015年8月25日
樓市嚟緊都有唔少不穩定因素,為免夜長夢多,近排多咗業主啃稅出貨。稅務局公布咗七月最新數字,要畀額外印花稅嘅交易有84宗,按月大增55.6%,創一三年十二月以來超過一年半新高,至於牽涉到嘅稅款都多咗58.5%至3,394萬元。不過,最近咁多新盤推出,都吸引到唔少內地客入市,所以七月份買家印花稅交易個案都多咗27.5%去到260宗咁多,涉及稅款就增約28.2%至6.07億元。

稅務局發言人同劉Sir講,印花稅署喺七月份確定84宗須繳付額外印花稅交易個案,比起六月增加咗55.6%,連續三個月上升,仲創埋一三年十二月後以來超過一半年新高,而期內涉及稅款亦增約58.5%至3,394萬元。

其中,持貨超過一年,但喺三年或以內轉售嘅個案就佔78宗,較六月多出五成,所牽涉嘅稅款亦都顯著增加約55.6%至3,242萬元。至於半年或以內、同埋喺超過半年但一年或以內轉售嘅交易,就只有2及4宗。

持貨逾年 多數有賺

之不過,劉Sir就咁睇,依家經濟環境其實唔係咁穩健,再加上加息又勢在必行。對於持貨多過一年嘅業主嚟講,就算扣番10%額外印花稅,通常都仲有得賺,喺前景唔明朗情況下,難怪多咗業主啃稅離場啦。

再睇返稅務局條數,須繳付買家印花稅嘅交易喺七月份就錄到260宗,相比六月都顯著增加咗約莫27.5%,期間所牽涉到嘅稅款大約6.07億元,對比返六月份都增加咗大約28.2%。

而樓價愈嚟愈高,買樓嘅成本多咗,所以非首置同投資者入市都慢咗。

內地客回歸 撐新盤

有關資料顯示,七月份雙倍印花稅交易宗數按月減少咗約莫8.8%去到4,145宗,不過始終樓價高企,所以涉及嘅稅款反而微升咗約0.2%,最新錄約21.58億元,金額係近半年來有紀錄最多。

最近咁多新盤推出,唔多唔少都吸引到內地客入市,好似烏溪沙迎海.駿岸、紅磡維港.星岸、同埋筲箕灣柏匯咁,之前發展商都話大約有一成買家係內地客。

劉Sir